बहुचर्चित व रखडलेल्या सुरत – चेन्नई ग्रीन कॉरिडॉर प्रकल्पाला केंद्रीय आर्थिक मंत्रिमंडळाची मान्यता मिळाल्याने कॉरिडॉरच्या कामाला गती मिळाली आहे.तीन दिवसापूर्वी राष्ट्रीय महामार्ग विभागाने सोलापूर हद्दीतील 80 किलोमीटरसह अहिल्यानगर, बीड, धाराशिव तसेच सोलापूर जिल्ह्यातील 220 किलोमीटरसाठी 8 हजार कोटींची निविदा प्रसिद्ध केली आहे.
या कॉरिडॉरचे काम BOT तत्त्वावर होणार असून दिनांक 19 मार्च रोजी ही निविदा खुली होईल.निविदेच्या अटी आणि शर्तीनुसार कमीत कमी दोन वर्षे तर, जास्तीत जास्त तीन वर्षात कॉरिडॉर पूर्ण करणे बंधनकारक राहणार आहे.दुसऱ्या टप्प्यात रिंग रोड साठी निविदा निघणार आहे.सोलापूर जिल्ह्यातील बार्शी, दक्षिण सोलापूर व अक्कलकोट या तीन तालुक्यातील 59 गावांमधून हा कॉरिडॉर जाणार आहे.हा सहा पदरी महामार्ग पाच वर्षांपूर्वी जाहीर झाला होता.यासाठी सोलापूर जिल्ह्यात भूसंपादन प्रक्रिया राबवण्यात आली. काहींना याची रक्कम मिळाली तर, काही बाधित शेतकऱ्यांना अद्यापही भूसंपादनाची रक्कम मिळालेली नाही.आता ही मंजुरी मिळाल्याने प्रलंबित रकमा जमा होण्याची प्रक्रिया सुरू झाली आहे.नाशिक, अहिल्यानगर व सोलापूरला जोडणारा हा मार्ग अक्कलकोट मार्गे पुढे कर्नुलला जोडला जाणार आहे.सोलापूर ते तिरुपती हा आठशे किलोमीटरचा प्रवास आता सहा तासात होणार आहे.
