सोलापुरातील छत्रपती शिवाजी महाराज सर्वोपचार रुग्णालयात बी ब्लॉक मधील सोनोग्राफी विभागात शॉर्टसर्किटमुळे आग लागली.रविवारी रात्री सातच्या सुमारास भीषण आग लागून धुराचे मोठे लोट निघाले असता महाराष्ट्र सुरक्षा बलाच्या जवानांनी आतील डॉक्टर आणि रुग्णांना त्वरित बाहेर काढले. यामुळे जीवितहानी टळली. अग्निशमक जवानांनी ही आग आटोक्यात आणली.
आगीमुळे धुराचे लोट दिसताच कर्तव्यावरील जवान नागेश कदम, विश्वनाथ माळी, वीरेंद्रसिंग चौधरी, यांनी धाव घेऊन आतील डॉक्टर नर्सेस आणि रुग्णांना बाहेर काढले. या घटनेची माहिती मिळताच वैद्यकीय अधीक्षक डॉक्टर संपत्ती तोडकर, सोनोग्राफी विभागाचे डॉक्टर सचिन सोनवणे हे घटनास्थळी दाखल झाले.
या आगीत सोनोग्राफी विभागातील फर्निचर, एअर कंडिशनर, संगणक सोनोग्राफी मशीन चे काही पार्ट्स जळाले आहेत.या विभागातील रुग्णांना उपचारासाठी बाह्य रुग्ण विभागात सेवा देण्याची सोय केली जाणार असल्याचे वैद्यकीय अधीक्षक डॉक्टर संपत्ती तोडकर यांनी सांगितले.
