सांगली जिल्ह्यातील जत नगरपरिषदेत मतदानाच्या एक दिवस अगोदर उपमुख्यमंत्री अजित पवार यांच्या नेतृत्वातील सत्ताधारी राष्ट्रवादी काँग्रेस काँग्रेसच्या नगराध्यक्षपदाच्या उमेदवाराच्या घरावर हल्ला करण्यात आला आहे. राष्ट्रवादीने या प्रकरणी थेट आपला मित्रपक्ष भाजपला जबाबदार धरले आहे. यामुळे येथील राजकीय वातावरण चांगलेच तापले आहे.
राष्ट्रवादी काँग्रेसने जत नगरपरिषदेच्या निडवणुकीत सुरेश शिंदे यांना नगराध्यक्षपदाची उमेदवारी दिली आहे. ते मतदारांच्या भेटीगाठी घेऊन जोमाने आपला प्रचार करत आहेत. इथे उद्या मतदान होणार आहे. पण तत्पूर्वी, आज पहाटे काही अज्ञात हल्लेखोरांनी सुरेश शिंदे यांच्या घरावर व गाडीवर दगडफेक करण्यात आली. त्यात सुदैवाने कुणीही जखमी जाले नाही. पण शिंदे यांच्या गाडीचे व घराचे मोठे नुकसान झाले. नगरपरिषदेसाठी उद्या मतदान होणार असताना आपल्या उमेदवाराच्या घरावर हा हल्ला झाल्यामुळे राष्ट्रवादी काँग्रेसने तीव्र संताप व्यक्त केला आहे.
विशेषतः राष्ट्रवादीच्या कार्यकर्त्यांत संतापाची लाट उसळली आहे. या प्रकरणी दोन्ही पक्षांचे कार्यकर्ते समोरासमोर येण्याची भीती असल्यामुळे शहरात तणावपूर्ण शांतता आहे. पोलिसांनी घटनास्थळी धाव घेऊन पंचनामा केला आहे. तसेच हल्लेखोरांचा शोध घेण्यासाठी पोलिस पथकही नियुक्त केले आहे. याकामी सीसीटीव्ही फुटेजचीही पाहणी करून आरोपींचा शोध घेण्याचा प्रयत्न केला जात आहे.
राष्ट्रवादीने हल्ल्यासाठी धरले भाजपला जबाबदार
दुसरीकडे, राष्ट्रवादीचे माजी आमदार विलास जगताप यांनी या घटनेसाठी भाजप आमदार गोपीचंद पडळकर यांच्या कार्यकर्त्यांना जबाबदार धरले आहे. हा हल्ला भाजप आमदार गोपीचंद पडळकर यांच्या कार्यकर्त्यांनी केला. निवडणुकीतील पराभवाड्या भीतीने त्यांनी असा भ्याड हल्ला केला, असे ते म्हणाले. नागरिकांनी या घटनेवर तीव्र चिंता व्यक्त केली आहे. तसेच या घटनेमुळे उद्याची निवडणूक शांततेत पार पडले का? असा प्रश्न उपस्थित केला आहे. काही नागरिकांनी या प्रकरणी पोलिसांना गस्त वाढवण्याचे आवाहन केले आहे.
रात्री 10 वा. होणार प्रचार बंद
राज्यातील 246 नगरपरिषदा व 42 नगरपंचायतीच्या प्रचाराचा धुरळा आज रात्री 10 वा. खाली बसेल. त्यानंतर उमेदवारांना प्रचाराच्या कुठल्याच जाहिराती प्रसिद्ध किंवा प्रसारित करता येणार नाहीत. राज्य निवडणूक आयोगाने मतदानाच्या दिवशी म्हणजे 2 डिसेंबर 2025 रोजी मुद्रित माध्यमांतही जाहिराती प्रसिद्ध करू नयेत, असे स्पष्ट केले आहे. दरम्यान, उद्याचे मतदान संपल्यानंतर दुसऱ्या दिवशी म्हणजे 3 डिसेंबर रोजी निवडूक निकाल जाहीर होणार आहे.
