अप्पर पोलिस अधीक्षक प्रीतम यावलकर आणि आयएमएच्या अध्यक्षा डॉ. मंजुषा शहा यांच्या हस्ते उदघाटन : चक्क एन्जोप्लास्टी झालेल्या नागरिकांनीही चालवली सायकल
सोलापूर : जागतिक हृदय दिनानिमित्त एसीएस हॉस्पिटल आणि रॉयल रायडर्स सायकलिंग असोसिएशनतर्फे रविवारी एसीएस सायक्लोथॉन २०२५ उत्साहात झाली. भैय्या चौक येथील एसीएस हॉस्पिटल येथे अप्पर पोलिस अधीक्षक प्रीतम यावलकर आणि आयएमएच्या अध्यक्षा डॉ. मंजुषा शहा यांच्या हस्ते एसीएस सायक्लोथॉनचे उदघाटन करण्यात आले. विशेष म्हणजे १० किलोमीटरच्या या सायक्लोथॉनमध्ये एन्जोप्लास्टी झालेल्या अनेक जणांनीही सहभाग घेत समाजाला सुदृढ आरोग्याचा अनोखा संदेश दिला.
दररोज सायकल चालवल्यामुळे हृदय मजबूत होते, हृदयाचे पंपिंग वाढते, ऑक्सिजन पुरवठा वाढतो, मसल्स स्ट्रॉंग बनतात व शरीराचा सर्वांगीण विकास होतो. हा संदेश देण्यासाठी या सायक्लोथॉनचे आयोजन करण्यात आले होते. भैय्या चौक येथून सुरू झालेली ही सायक्लोथॉन छत्रपती श्री शिवाजी महाराज चौक, एस टी स्टॅन्ड, बाळीवेस, मधला मारुती, श्री आजोबा गणपती, जिल्हा परिषद, रंग भवन, हरीभाई देवकरण शाळा, डफरीन चौक, महापौर निवास, गांधी पुतळा, रेल्वे स्थानक, भैय्या चौक, रामलाल चौकमार्गे एसीएस हॉस्पिटल येथे विसर्जित झाली.
अप्पर पोलिस अधीक्षक प्रीतम यावलकर म्हणाले, आपली जीवनशैली व्यायामयुक्त असेल तर हृदय मजबूत राहते. तसेच हृदयरोग किंवा अन्य आजार होण्याची शक्यता कमी होते. त्यामुळे नागरिकांनी सायकल चालविण्यासह विविध व्यायामाकडे लक्ष द्यावे. डॉ. प्रमोद पवार म्हणाले, एन्जोप्लास्टी नंतर हृदय कमकुवत होते, हा समाजातील गैरसमज आहे. प्रत्येकाने दैनंदिन जीवनात व्यायामाचा अंगीकार केला तर हृदयावरील शस्त्रक्रियेनंतरही निरोगी आणि सुदृढ जीवन जगता येऊ शकते. डॉ. सिद्धांत गांधी म्हणाले, हृदय शस्त्रक्रिया झाल्यानंतर पुढील आयुष्य निरोगी आणि सुदृढ राहणार नाही, अशी शंका अनेकांच्या मनात असते. परंतु एन्जोप्लास्टी झालेल्या अनेकांनी १० किमीच्या एसीएस सायक्लोथॉनमध्ये सहभागी होऊन हा समज खोटा ठरविला आहे.
यावेळी डॉ. सिद्धांत गांधी, डॉ. प्रमोद पवार, डॉ. राहुल कारीमुंगी, डॉ. दीपक गायकवाड, डॉ. मंजुषा शहा आदी उपस्थित होते.
