माढा : भाजपाचे विद्यमान खासदार रणजीत निंबाळकर यांना उमेदवारी दिल्यामुळे मोहिते पाटील कुटुंबीयांनी विशेषता धैर्यशील मोहिते पाटील यांनी त्यांच्या विरोधात बंडाचे निशाण दाखवले आहे. त्यामुळे मोहिते पाटील यांच्या भूमिकेकडे लक्ष लागले आहे. नाराज झालेली धैर्यशील मोहिते पाटील शरद पवारांना भेटून हाती तुतारी घेणार अशी चर्चा सुरू असताना आज खासदार अमोल कोल्हे यांनी शिवरत्न बंगल्यावर मोहिते पाटील यांची भेट घेतली.
यावेळी विजयसिंह मोहिते पाटील, आमदार रणजीत सिंह मोहिते पाटील, धैर्यशील मोहिते पाटील आदी उपस्थित होते विशेष म्हणजे अमोल कोल्हे आले त्यावेळी त्यांचे तुतारी वाजवून शिवरत्न बंगल्यावर स्वागत करण्यात आले. त्यामुळे आता मोहिते पाटील खरंच शरद पवारांची तुतारी हाती घेणार का या चर्चेला उधाण आले आहे खासदार अमोल कोल्हे यांनी मात्र मी एका लग्नानिमित्त अकलूजला आलो होतो. मोहिते पाटलांची आशीर्वाद घेण्यासाठी त्यांच्या शिवरत्न बंगल्यावर आलो असे वक्तव्य केले.
