सोलापूर विद्यापीठ: सहा भारतीय लोककलांचा समावेश!
प्रभारी कुलगुरू डॉ. राजनीश कामत यांची घोषणा
राजाभाऊ सरवदे यांच्यासह संघटनांची होती मागणी
सोलापूर, दि. 14- नवीन राष्ट्रीय शैक्षणिक धोरणामध्ये भारतीय ज्ञान, परंपरा आणि संस्कृतीला विशेष महत्त्व असून यामुळे विद्यार्थ्यांचा समग्र व्यक्तिमत्व विकास घडविण्याचा प्रयत्न आहे. याच अनुषंगाने पुण्यश्लोक अहिल्यादेवी होळकर सोलापूर विद्यापीठाच्या युवा महोत्सवात यंदाच्या वर्षापासून सहा नवीन भारतीय लोककलांचा समावेश करण्यात आल्याची घोषणा प्रभारी कुलगुरू डॉ. राजनीश कामत यांनी केली. यामध्ये भजन, भारुड, पोवाडा, शाहिरी जलसा, कव्वाली आणि लावणी या लोककला प्रकारांचा समावेश आहे.
पुण्यश्लोक अहिल्यादेवी होळकर सोलापूर विद्यापीठाच्या युवा महोत्सवामध्ये भारतीय लोककला प्रकारांचा समावेश करण्याची मागणी विद्यापीठाचे व्यवस्थापन परिषद सदस्य राजाभाऊ सरवदे यांच्यासह विविध संघटनांनी केली होती. त्याचबरोबर काही वर्तानपत्रातही यासंदर्भात वृत्त प्रसिद्ध झाले आहे. या अनुषंगाने गुरुवारी प्रभारी कुलगुरू डॉ. राजनीश कामत यांनी युवा महोत्सवात समावेश असलेल्या विविध कला प्रकारांचा आढावा घेतला. यावेळी त्यांनी नवीन शैक्षणिक धोरणात समाविष्ट असलेल्या विविध बाबींचा विचार करून भारतीय लोककला व संस्कृतीला प्रोत्साहन देण्यासाठी नव्याने भजन, भारुड, पोवाडा, शाहिरी जलसा, कव्वाली आणि लावणी या कलाप्रकारांचा समावेश करण्याची घोषणा केली. यातील काही कलाप्रकार युवा महोत्सवात होते, मात्र मागील सहा वर्षांपासून युवा महोत्सवातून वगळण्यात आले होते. त्यामुळे आता युवा महोत्सवात कला प्रकारांची संख्या वाढली आहे.
यंदाचा युवा महोत्सव हा दि. 10 ते 13 ऑक्टोबर 2023 दरम्यान पंढरपूर येथील श्री विठ्ठल अभियांत्रिकी महाविद्यालय (स्वेरी कॉलेज) येथे रंगणार आहे. संलग्नित महाविद्यालयाच्या विद्यार्थ्यांनी युवा महोत्सवाची तयारी सुरू केली आहे. आता नव्याने समाविष्ट करण्यात आलेल्या या नवीन सहा कला प्रकारांची तयारीही विद्यार्थ्यांनी करावी. चांगल्या प्रकारे कलागुण सादर करण्यासाठीही विद्यार्थ्यांनी तयारी करावी, असे आवाहन देखील प्रभारी कुलगुरू डॉ. राजनीश कामत यांनी केले आहे.
