महामार्गावरील अपघातग्रस्त पक्षाला वाचवण्यात सुरवसे बहिण-भावाला आले यश
सोलापूर – पुणे महामार्गावरील मोडनिंब येथील सोलंकरवाडी पाटी नजीक महामार्गाच्या मध्यभागी तडफडत असलेल्या अपघातग्रस्त भारद्वाज पक्षाला दोन विद्यार्थ्यांमुळे जीवदान मिळाले. ही घटना आज सकाळी सात वाजण्याच्या सुमारास घडली. अरण जिल्हा परिषद प्राथमिक शाळेच्या दोन विद्यार्थ्यांचा प्रयत्नामुळे या पक्षाचा जीव वाचला. या विशेष कामगिरीबद्दल या विद्यार्थ्यांचे सर्वत्र कौतुक होत आहे. इयत्ता सातवीत शिकणाऱ्या अर्णव प्रकाश सुरवसे आणि इयत्ता चौथी मध्ये शिकत असलेल्या अपूर्वा परमेश्वर सुरवसे हे बहिण- भाऊ सकाळी पावणेसात वाजण्याच्या सुमारास शाळेला निघाले होते. महामार्गावरून जात असताना महामार्गाच्या मध्यभागी तडपडत असलेल्या अपघात ग्रस्त भारद्वाज पक्षाकडे अर्णव चे लक्ष गेले.
अर्णव आणि अपूर्वा या दोन विद्यार्थ्यांनी या पक्षाला घरी नेले आणि त्यास पाणी पाजले. वाहनाच्या धडकेने हा पक्षी बेशुद्ध पडला होता. ही घटना घडल्यानंतर अनेक वाहने या पक्षाला जवळून गेली मध्यभागी हा पक्षी पडल्याने तो काही काळ तडफडत राहिला. अजून काही वेळ गेली असती तर हा पक्षी नक्कीच इतर वाहने अंगावरून गेल्याने मरण पावला असता. सध्या ऊन वाढत असल्याने पक्षी सुद्धा मानव वसाहतीमध्ये वावरत आहेत. जिल्ह्यात तापमान वाढत आहे. सध्या उन्हाळ्याचे दिवस असल्याने वन्य प्राणी व पक्षी पाण्याच्या आणि निवाऱ्याच्या शोधात असतात. पाण्याच्या शोधात असणाऱ्या या पक्षाला महामार्ग ओलांडत असताना वाहनाची धडक बसल्याने ही घटना घडली असण्याची शक्यता आहे. विशेष कामगिरीबद्दल वर्गशिक्षिका सविता बलभीम गोरे यांनी या विद्यार्थ्यांचे खास अभिनंदन केले
