नवी दिल्ली : पराभवाच्या गर्तेत अडकलेल्या काँग्रेसला आता निवडणूक रणनीतीकार प्रशांत किशोर बाहेर काढणार का? हा प्रश्न पुन्हा उपस्थित होण्याचं कारण दिल्लीत झालेली एक गुप्त भेट आहे. पाच राज्यांच्या निकालानंतर प्रशांत किशोर हे काँग्रेस नेते राहुल आणि प्रियंका गांधी या दोघांनाही भेटल्याचं कळतंय. त्यामुळे ज्या प्रशांत किशोर यांची मदत आधी काँग्रेसनं नाकारली होती, त्याच प्रशांत किशोर यांच्यावर पक्ष आाता विश्वास ठेवणार का हे पाहणं महत्वाचं असेल.
प्रशांत किशोर हे जवळपास वर्षेभरापूर्वीच राहुल प्रियंका गांधींना भेटलेले होते. त्यावेळी 2024 च्या दृष्टीनं भाजपला हरवण्यासाठी ते प्लॅन आखत असल्याचं बोललं जात होतं. अगदी प्रशांत किशोर थेट काँग्रेसमध्ये सहभागी होणार अशा पद्धतीच्या चर्चाही त्यावेळी सुरु होत्या. पण ज्या व्यक्तीनं 2014 ला मोदींसोबत काम केलेलं आहे, त्यावर इतका विश्वास टाकायला पक्षातलेच अनेक नेते तयार नव्हते.
काँग्रेसपासून दुरावल्यानंतर मधल्या काळात ब-याच घडामोडी घडल्या. प्रशांत किशोर हे तृणमूल काँग्रेससोबत काम करत आहेत. त्यामुळे तृणमूल काँग्रेसमध्ये अनेक काँग्रेस नेत्यांचे प्रवेश झाले. गोव्यात तर तृणमूल काँग्रेसनं निवडणूक लढवत काँग्रेसची वाट अवघड करुन टाकली. दोन आमदार तृणमूल काँग्रेसचे निवडून आले. या वर्षाअखेरीस गुजरात, हिमाचल प्रदेश आणि त्यानंतर कर्नाटक सारख्या महत्वाच्या राज्यांच्या निवडणुका आहेत.
