सोलापूर : वन्यप्राणी, पक्षी, वृक्ष, फुलपाखरू यांसह जैवविविधतेबाबत लोकजागृती वाढावी, या उद्देशाने पाच ते १२ नोव्हेंबर दरम्यान पक्षी सप्ताह आयोजिला आहे. या निमित्ताने सोलापूर वन विभागाने विविध कार्यक्रम आयोजिले आहेत, अशी माहिती उपवन संरक्षक धैर्यशील पाटील यांनी दिली.
भारतीय पक्षी विश्व जागतिक स्तरावर पोहोचवणारे डॉ.सलीम अली व वन्यजीव विषयक साहित्यनिर्मिती अग्रणी असलेले सेवानिवृत्त वन अधिकारी मारुती चितमपल्ली यांच्या सन्मानार्थ पक्षी सप्ताहाचे आयोजन करण्यात आले आहे. सोलापूर वन विभागातर्फे विद्यार्थी, नागरिक, ज्येष्ठांसाठी विविध स्पर्धा, कार्यक्रम आयोजिले आहेत.
शुक्रवार (िद.५) शालेय विद्यार्थी गट व खुला गट यांच्याकरिता निबंध स्पर्धा व घोषवाक्य स्पर्धा आयोजिली आहे. शनिवारी (दि.६) चित्रकला स्पर्धेचे आयोजन केले आहे. पाच ते १५ वर्षे वयोगटातील शालेय विद्यार्थ्यांसाठी ऑनलाइन स्पर्धेद्वारे [email protected] या ई-मेल वरती निबंध व चित्रे मागवण्यात येणार आहेत.
रविवारी (दि.७) जिल्ह्यातील विविध शासकीय संस्था व निसर्गप्रेमी यांच्या संयुक्त विद्यमाने विविध कार्यक्रमाचे आयोजन करण्यात आले आहे. पक्षी छायाचित्र, मार्गदर्शन, वन्य जीवांचे महत्त्व, वन कर्मचारी यांच्यासाठी पक्षीविषयक मार्गदर्शन आयोजिले आहे. या कार्यक्रमासाठी ज्येष्ठ साहित्यिक अरण्यऋषी मारुती चित्तमपल्ली हे उपस्थित राहणार आहेत. तांत्रिक अडचण आल्यास कार्यालयातील ८२३७००२२८५, ९५९५७५१०८४ या मोबाइल नंबरवर संपर्क साधावा असे, आवाहन उपवन संरक्षक धैर्यशील पाटील यांनी केले आहे.
निबंध स्पर्धेसाठीच विषय
१) गवताळ प्रदेशात आढळणारे पक्षी
२) भारतीय संस्कृतीतील पक्षी दर्शन
३)वातावरण बदलाचा पक्षी जीवनावर होणारा परिणाम
शालेय विद्यार्थ्यांसाठी विषय
१) पक्षी आपले मित्र
२) माझा आवडता पक्षी
३) पक्षी सप्ताहाचे महत्त्व
घोषवाक्य स्पर्धेसाठी
१) पर्यावरण संवर्धन
२) शाश्वत विकास(पर्यावरणाबाबत)
३) वन्यजीव व पक्षी
