गुगल वाचून तज्ञ होणारे सामान्य लोक त्रासदायक : डॉ. शर्मा

मुतखडा मूत्रनलिकेत अडकला तरच त्रास
सोलापूर : गुगल वाचून सध्या सामान्य लोक बारा मिनिटात डॉक्टर पेक्षा तज्ञ होतात. मूतखडा झाला आहे तातडीने सोनोग्राफी करा, असा सल्ला हे लोक डॉक्टरांना देतात असे डॉक्टर ग्यानेद्र शर्मा यांनी रविवारी सांगितले. ज्येष्ठ नागरिक संघाच्या सदस्यांना चितळे क्लिनिक येथे मूत्रविकार तज्ञ डॉक्टर शर्मा यांनी मार्गदर्शन केले. हा कार्यक्रम एमएसएन लॅब्स प्रा. लिमिटेडतर्फे आयोजित केला होता .
संघाचे अध्यक्ष घनश्याम दायमा, कार्यकारी संचालक गुरुलिंग कन्नूरकर, सचिव नागनाथ पाटील यावेळी उपस्थित होते. संघाच्या कार्याध्यक्षा श्रीमती कमला शर्मा आणि डॉक्टर अंशू शर्मा यादेखील कार्यक्रमास उपस्थित होत्या. सोनोग्राफीमध्ये मुतखडा शंभर टक्के दिसतो, हा गैरसमज असल्याचे डॉक्टर यांनी स्पष्ट केले यूरिन टेस्ट, ब्लड टेस्ट तसेच पूर्वइतिहास जाणून घेतल्यानंतर मुतखड्याचे निदान करता येते . मोठा खड्डा असूनही त्रास होतोच असे नाही मात्र मूत्रनलिकेत खडा अडकला तर वेदना जास्त होतात असेही त्यांनी सांगितले. मुतखडा काढण्यासाठी अजूनही ओपन सर्जरी होतात, असे सांगून डॉक्टर शर्मा म्हणाले लेसर ट्रीटमेंट केल्यानंतर खडे परत होतात हे अर्धसत्य आहे. कारण एकदा खडा काढल्यानंतर बहुतेक लोक साधारणपणे तीन महिने पथ्य पाळतात व त्यानंतर कोणतीही काळजी न घेता पूर्वीप्रमाणेच आहार घेऊ लागतात दररोज जास्तीत जास्त पाणी पिणे आणि दिवसभरात अडीच ते तीन लिटर लघवी होत आहे का? याबाबत लोकांनी विशेषतः मूत्र विकार असणाऱ्यांनी सतर्क राहिले पाहिजे असेही त्यांनी स्पष्ट केले. अळू खाल्ल्याने मुतखडा विरघळतो आणि दुध पिले तर खडे होतात हे काही सार्वत्रिक गैरसमज असल्याचेही त्यांनी स्पष्ट केले.प्रोस्टेट ग्लांडस पूर्णपणे कधीही काढून टाकली जात नाही त्याचा काही भाग काढण्यात येतो फक्त कॅन्सर झाला असेल तरच प्रॉस्टेट काढली जाते असेही डॉक्टर शर्मा म्हणाले. मुतखडा कशामुळे होतो, कोणती पथ्य पळायची आणि एकूणच विविध आजारांवर लोक आता गूगलवर सर्च करत राहतात असे सांगून डॉक्टर शर्मा म्हणाले, हे सर्व आजार इतके सहजपणे समजून येत नाहीत. मला स्वतःला बारावी नंतर बारा वर्षे शिक्षण घेतल्यानंतर मुतखडा व त्यावरील सर्जरी बाबत ज्ञान झाले असे त्यांनी स्पष्ट केले.