नवी दिल्ली : पंतप्रधान आवास योजनेमधील भ्रष्टाचाराचा सीबीआयने पर्दाफाश केलाय. या प्रकरणात सीबीआयने डीएचएफएलचे संचालक कपिल वाधवन आणि धीरज वाधवन यांची आरोपी म्हणून नावे नोंदविली आहेत. एनडीटीव्हीच्या छापील अहवालानुसार, या योजनेचा गैरफायदा घेण्यासाठी दोन्ही भावांनी बनावट होम लोन अकाऊंट तयार केले असून, गृहकर्जाची रक्कम 14000 कोटी इतकी आहे आणि या दोन भावांच्या माध्यमातून व्याज अनुदानाने 1880 कोटी मिळविलेत.
पंतप्रधान आवास योजना ऑक्टोबर 2015 मध्ये सुरू
फसवणूक आणि पैशाच्या अफरातफरीच्या प्रकरणात दोन्ही भाऊ सध्या तुरुंगात आहेत. पंतप्रधान आवास योजना ऑक्टोबर 2015 मध्ये सुरू करण्यात आली होती. सर्वांसाठी घरांचे उद्दिष्ट पूर्ण करण्यासाठी ही योजना सुरू केली गेली. या योजनेंतर्गत आर्थिकदृष्ट्या दुर्बल लोकांना गृह कर्जावरील व्याज अनुदानाचा लाभ मिळतो. अनुदानाचा दावा डीएचएफएलसारख्या वित्तीय संस्थांकडून केला जातो. जर आपण या योजनेंतर्गत एखाद्या बँकेकडून कर्ज घेतले असेल तर ते बँक सरकारकडून सबसिडीचा दावा करते.
