सोलापूर दक्षिणमध्ये परिवर्तनाचे वारे
वंचित बहुजन आघाडीचे सोलापूर दक्षिणचे अधिकृत उमेदवार संतोष पवार यांच्या प्रचारार्थ नई जिंदगी आणि घोडा तांडा येथे आयोजित जनसन्मान सभेला बंजारा आणि मुस्लिम समाजाचा मोठा प्रतिसाद मिळाला. उपस्थितांच्या उत्स्फूर्त सहभागामुळे या सभेला विशेष महत्त्व प्राप्त झाले. पवार यांनी या सभेत तालुक्याच्या विकासाच्या अपुऱ्या स्थितीवर गंभीर चिंता व्यक्त केली आणि प्रस्थापित राजकीय व्यवस्थेवर कठोर टीका केली.
“सोलापूर जिल्ह्याने एकेकाळी राज्याच्या मुख्यमंत्री पदावर नेते दिले, मोठमोठी मातब्बर मंडळी तालुक्यातून निवडून गेली. बारामतीने जितकी पदं भूषवली, तितकीच सोलापूरनेही मिळवली, मात्र याचा फायदा तालुक्याच्या सर्वसामान्य जनतेला कधीच झाला नाही. विकासाच्या संधी बाजूला सारून फक्त घराणेशाही आणि राजकीय स्वार्थाची पोषणं झाली, असे संतोष पवार यांनी सांगितले.
पवार यांनी स्पष्ट केले की, तालुक्यात मंजूर झालेला MIDC प्रकल्प राजकीय डावपेचांसाठी रद्द करण्यात आला. यामुळे स्थानिकांना रोजगाराच्या संधी गमवाव्या लागल्या. “सिंचन क्षेत्र आजही तुटपुंजं आहे. नवनवीन प्रकल्पांची कामं प्रलंबित आहेत. निधी आला तरी तो योग्य ठिकाणी वापरण्यात अयशस्वी ठरलं जात आहे,” असे पवार म्हणाले.
जातीयवाद थांबवून विकासाच्या दिशेने वाटचाल हवी
“तालुक्यात जाती-धर्मावर आधारित राजकारण सर्रास सुरू आहे. यामुळे सामान्य माणसाच्या प्रगतीवर विपरीत परिणाम होत आहे. आता हे राजकारण थांबवून विकासाच्या मुद्यांवर चर्चा आणि काम होण्याची गरज आहे,” असे ठामपणे पवार यांनी मांडले.
हद्दवाढ भागातील विकासही थांबलेला
संतोष पवार यांनी नगरसेवक, आमदार आणि त्यांच्या विकासाच्या गप्पांवरही प्रकाश टाकला. “हद्दवाढ भागातील परिस्थिती पाहिली तर कोट्यवधींचा निधी आल्याच्या गप्पा केल्या जातात. मात्र प्रत्यक्षात विकास काहीच झालेला नाही. लोकांच्या मूलभूत गरजाही पूर्ण झालेल्या नाहीत,” असे ते म्हणाले.
परिवर्तनाशिवाय पर्याय नाही
“दर पाच वर्षांनी तीच प्रस्थापित घराणी, तेच पारंपरिक चेहरे विकासाच्या गाजरं दाखवतात. मात्र त्यांचं काम फक्त सत्ता उपभोगण्यापुरतं मर्यादित राहतं. आज तालुक्याचं हे चित्र बदलायचं असेल तर परिवर्तन हाच एकमेव उपाय आहे. परिवर्तनासाठी वंचित बहुजन आघाडीला संधी द्या,” असे भावनिक आवाहन संतोष पवार यांनी केलं.
ग्रामस्थांचा पाठिंबा आणि परिवर्तनाचा निर्धार
सभेला बंजारा आणि मुस्लिम समाजाच्या लोकांनी मोठ्या संख्येने हजेरी लावली. त्यांच्या पाठिंब्यामुळे वंचित बहुजन आघाडीचा आत्मविश्वास अधिकच वाढला आहे. “आमच्या समाजाचा विकास साधण्यासाठी संतोष पवार यांच्यासारख्या नेतृत्वाला पाठिंबा देणं आवश्यक आहे,” असे स्थानिकांनी व्यक्त केले.
पदाधिकाऱ्यांची ठाम भूमिका
सभेत वंचित बहुजन आघाडीचे पदाधिकारी आणि मार्ग फाऊंडेशनचे कार्यकर्तेही मोठ्या संख्येने उपस्थित होते. त्यांनीही समाजाच्या प्रगतीसाठी आणि तालुक्याच्या सर्वांगीण विकासासाठी संतोष पवार यांना पाठिंबा देण्याचे आवाहन केले.
सोलापूर दक्षिणमध्ये परिवर्तनाची चाहूल
नई जिंदगी आणि घोडा तांडा येथे पार पडलेल्या या सभेमुळे संतोष पवार यांच्या नेतृत्वाखाली सोलापूर दक्षिण मतदारसंघात परिवर्तनाची हवा निर्माण झाली आहे. येणाऱ्या निवडणुकीत वंचित बहुजन आघाडी विजय मिळवून विकासाचा नवा अध्याय सुरू करेल, असा विश्वास लोकांमध्ये दिसून येत आहे.
