नाशिक : भोसला मिलिटरी स्कूलच्या परिसरात बिबट्याचा वावर असल्याची माहिती काही नागरिकांनी वन विभागाला दिली,काही नागरिकांनी बिबट्या बघितल्याचा देखील दावा केला.माहिती मिळताच वन विभागाचे अधिकारी आणि कर्मचारी व गंगापूर पोलिसांनी तत्काळ भोसला मिलिटरी स्कूल चा कॅम्पस गाठून येथे बिबट्याचा शोध घेण्यासाठी सुरुवात केली.परिसरात झाडे झुडपे आणि मोठ मोठे गवत असल्याने बिबट्याचा शोध घेण्यास अडचणी निर्माण होत होत्या.त्यांनंतर थर्मल ड्रोनच्या माध्यमातून वन विभाग आणि रेस्क्यू टीम कडून बिबट्याचा परिसरात शोध घेतला गेला.
जवळ जवळ 2 ते अडीच तासाच्या शोध मोहिमेनंतर परिसरात बिबट्याचा वावर नसल्याचे वन विभागाचे वन परिक्षेत्र अधिकारी,सुमित निर्मळ यांनी स्पष्ट केले.तर नागरिकांनी कुठल्याही अफवांवर विश्वास ठेऊ नये असे आवाहन देखील वन अधिकारी यांच्याकडून यावेळी करण्यात आले आहे.परिसरात बिबट्याचा वावर नाल्याची खात्री झाल्यानंतर सर्वांनीच सुटकेचा निःश्वास घेतला.
असे असले तरी मात्र नागरिकांनी सावधगिरी बाळगावी व बिबट्या बाबत काहीही हालचाल आढळून आल्यास तत्काळ वनविभागाशी संपर्क साधावा असे देखील आवाहन यावेळी करण्यात आले आहे.
पालकांची धावपळ
भोसला स्कूलच्या परिसरात बिबट्या शिरल्याचवी माहिती वाऱ्यासारखी पसरली आणि आपल्या पाल्यांना घरी घेऊन जाण्यासाठी पालकांनी शाळेकडे धाव घेतली,शाळा प्रशासनाने देखील खबरदारी म्हणून सकाळच्या सत्रातील विद्यार्थ्याना तत्काळ सुट्टी देण्यात आली.तर दुपारच्या सत्रातील शाळेला देखील सुट्टी देण्यात आली.
