आमदार सुभाष देशमुख यांनी दिल्लीत घेतली भेट
सोलापूर : सिना नदीला आलेल्या पुरामुळे दक्षिण सोलापूर तालुक्यातील रस्ते उखडून गेले आहेत. या सर्व रस्त्यांचे सर्वेक्षण करून उखडलेल्या रस्त्यांची पुनर्बांधणी करण्याची तयारी केंद्रिय रस्ते वाहतूक मंत्री नितीन गडकरी यांनी दर्शवली आहे.
सोलापूर दक्षिणचे आमदार सुभाष देशमुख यांनी नुकतीच दिल्ली येथे केंद्रीय मंत्री नितीन गडकरी यांची भेट घेऊन पूरस्थितीची माहिती दिली. सिना नदीच्या पुरात शेतकऱ्यांचे मोठे नुकसान झाल्याचे त्यांनी निदर्शनास आणून दिले. तसेच दक्षिण सोलापूर तालुक्यातील रस्त्यांचेही मोठे नुकसान झाल्याचे सांगून या रस्त्यांची तातडीने पुनर्बांधणी करण्याची मागणी केली.
यासंदर्भात मंत्री नितीन गडकरी यांनी तातडीने पूरग्रस्त भागातील रस्त्यांचे सर्वेक्षण करण्याचे आदेश संबंधित अधिकाऱ्यांना दिले. सर्वेक्षणाचा अहवाल प्राप्त होताच रस्ते पुनर्बांधणीसाठी निधीची तरतूद केली जाईल, असे आश्वासन गडकरी यांनी दिले.
या भेटीत आमदार सुभाष देशमुख आणि ज्येष्ठ पत्रकार विवेक घळसासी उपस्थित होते. विकासाच्या अनेक मुद्यांवर या बैठकीत चर्चा झाली. तालुक्यात राहवण गाव योजनेंतर्गत सुरू असलेल्या प्रकल्पाची माहितीही आमदार देशमुख यांनी दिली.
पर्यटन सप्ताहानिमित्त आयोजित विविध उपक्रम, नागरिकांचा प्रतिसाद आणि त्याचे फलित यादरम्यान चर्चिले गेले. राष्ट्रीय महामार्गाच्या दोन्ही बाजूंना वृक्षलागवड करण्याची मागणीही आमदार देशमुख यांनी केली. याशिवाय तालुक्यातील विविध प्रश्नांबाबतही मंत्री गडकरी यांना निवेदन देण्यात आले.
