9 हजार 943 विद्यार्थ्यांना पदवी प्रदान होणार
46 संशोधकांना पीएच.डी पदवी तर 59 सुवर्णपदकाचेही वितरण होणार
सोलापूर- पुण्यश्लोक अहिल्यादेवी होळकर सोलापूर विद्यापीठाचा एकोणिसावा दीक्षांत समारंभ बुधवार, दि. 21 फेब्रुवारी 2024 रोजी सकाळी अकरा वाजता विद्यापीठाच्या दीक्षांत मैदानात होणार असून यावेळी एकूण 9 हजार 943 विद्यार्थ्यांना पदवी प्रदान करण्यात येणार असल्याची माहिती कुलगुरू प्रा. प्रकाश महानवर यांनी रविवारी पत्रकार परिषदेत दिली. याचबरोबर 46 संशोधक विद्यार्थ्यांना पीएच. डी पदवी तर 59 विद्यार्थ्यांना सुवर्णपदके देऊन सन्मानित करण्यात येणार असल्याचेही त्यांनी सांगितले.
महाराष्ट्राचे राज्यपाल तथा विद्यापीठाचे कुलपती श्री रमेश बैस यांच्या अध्यक्षतेखाली हा समारंभ होणार आहे. राज्यपाल महोदय हे ऑनलाईन माध्यमातून या सोहळ्यासाठी जोडले जाणार आहेत. या समारंभास प्रख्यात निवृत्त प्राध्यापक तथा पद्मविभूषण प्रा. एम. एम. शर्मा आणि सोलापूरचे खासदार डॉ. जयसिद्धेश्वर शिवाचार्य महास्वामी यांची प्रमुख उपस्थिती राहणार आहे. प्रशासकीय इमारतीपासून ते दीक्षांत मंडपापर्यंत दीक्षांत मिरवणूक निघणार आहे. परीक्षा व मूल्यमापन मंडळाचे प्रभारी संचालक डॉ. मलिक रोकडे हे ज्ञानदंड हाती घेऊन मिरवणुकीच्या अग्रभागी असणार आहेत. त्यानंतर प्रत्यक्ष कार्यक्रमाला सुरुवात होईल. या समारंभात वाणिज्य व व्यवस्थापन विद्याशाखा, मानवविज्ञान विद्याशाखा, आंतर विद्याशाखा, विज्ञान व तंत्रज्ञान विद्याशाखेच्या विद्यार्थ्यांना पदवी देऊन सन्मानित करण्यात येईल.
यावर्षी 46 विद्यार्थ्यांना पीएच.डी पदवी प्रदान केली जाणार आहे. त्याचबरोबर यंदा 59 विद्यार्थी सुवर्णपदकाचे मानकरी ठरले आहेत. विविध विषयात गुणानुक्रमे प्रथम आलेल्या विद्यार्थ्यांना देणगीदारांनी दिलेल्या रकमेतून सुवर्णपदक देऊन त्यांचा यथोचित सन्मान केला जातो. अशा एकूण 59 विद्यार्थ्यांना सुवर्णपदक देऊन सन्मानित केले जाणार आहे.
दीक्षांत समारंभाचा कार्यक्रम झाल्यानंतर विद्यार्थ्यांना पदवी प्रमाणपत्र वाटप केले जाणार आहे. यासाठी विद्यापीठ परीक्षा विभागाने खास सोय केलेली आहे.
या पत्रकार परिषदेस प्र-कुलगुरू प्रा. लक्ष्मीकांत दामा, परीक्षा व मूल्यमापन मंडळाचे प्रभारी संचालक डॉ. मलिक रोकडे, राज्यपाल नियुक्त व्यवस्थापन परिषदेचे सदस्य प्रा. देवानंद चिलवंत आदी उपस्थित होते.
पदवी घेणाऱ्या विद्यार्थ्यांसाठी खास ‘उपरणे’
दीक्षांत समारंभात पदवी घेणारे स्नातक आणि पदवी प्रदान करणाऱ्या मान्यवरांना आता खास उपरणे राहणार आहे. विद्यापीठ अनुदान आयोगाच्या निर्देशानुसार विद्यापीठ प्रशासनाने गटित समितीच्या शिफाशीनुसार यंदाच्या वर्षापासून दीक्षांत सोहळ्यासाठी नवा खास पिवळ्या रंगाचा व विद्यापीठ लोगो आणि अहिल्यादेवींचा फोटो असलेले खास उपरणे तयार केले आहे. हे उपरणे गळ्यात घालून विद्यार्थी यंदाच्या सोहळ्यात पदवी स्वीकारणार आहेत.
