गुन्हे शाखेची कामगिरी ६ गुन्हे उघड, एकास अटक

सोलापूर : पोलीस आयुक्तालयाच्या गुन्हे शाखेने मोटारसायकल व मोबाईल चोरी करणाऱ्या आरोपीस पकडून ५ मोटारसायकली व ४ मोबाईल हस्तगत केले आहेत. एकूण सहा गुन्हे उघडकीस आले असून या मोटार सायकली आणि मोबाईलची किंमत ३ लाख ७० हजार रुपये असल्याचे पोलिस आयुक्तांच्या प्रसिद्धी पत्रकात म्हटले आहे. भवानी पेठेतील सिद्धेश्वर हाउसिंग सोसायटी, तरटी नाक्याजवळील सेंट्रल बँकेसमोर , भवानी पेठ येथील तुळजापूर वेस, श्रीशैल नगर , नवीन विडी घरकुल तसेच जत जिल्हा सांगली येथून मोटारसायकली व मोबाईल चोरून आणल्याचे उघडकीस आले आहे. हैदराबाद रस्त्यावरील धोत्रीकर वस्ती येथे राहणारा विकास उर्फ विकी भिवा पवार या पंचवीस वर्षाच्या तरुणाची चौकशी केल्यानंतर विविध पोलिस ठाण्यातील ६ गुन्हे उघडकीस आले आहेत. जोडभावी पेठ पोलीस ठाणे, फौजदार चावडी, वळसंग पोलिस ठाणे, जत पोलीस ठाणे येथे नोंदविण्यात आलेले हे गुन्हे उघडकीस आल्याचे गुन्हे शाखेने स्पष्ट केले आहे. सहाय्यक पोलीस निरीक्षक सचिन बंडगर व त्यांच्या पथकाने मिळालेल्या माहितीनंतर दयानंद कॉलेज चौकात ५ जून रोजी सापळा रचून टीव्हीएस अपाची मोटार सायकलवरून येणाऱ्या विकी पवार या तरुणास शिताफीने पकडून हे गुन्हे उघडकीस आणले आहेत. चोरीस गेलेल्या मोटारसायकली पंचांसमक्ष जप्त करून ताब्यात घेण्यात आल्या आहेत.