ऑफिसर्स क्लब भाडेकरार संशयाच्या भोवऱ्यात ! उपजिल्हाधिकाऱ्यांची मनमानी

सोलापूर जिल्हाधिकारी यांच्या अधिपत्याखाली असलेल्या ऑफिसर्स क्लब मधील कॅन्टींग, रेस्टॉरंट आणि बार चालविण्यास देण्याबाबत टेंडर काढण्यात आले होते. एकूण आठ जणांनी टेंडर भरले. मात्र पारदर्शक पद्धतीने हे टेंडर न उघडता जादा रक्कम भरणाऱ्या निविदा धारकास डावलून उपजिल्हाधिकारी तथा ऑफिसर क्लबचे सचिव संतोष देशमुख तसेच ऑफिसर्स क्लबचे खजिनदार योगेश पाटील यांनी डायरेक्ट नवनाथ इंदापुरे यांना हे टेंडर दिले आहे. त्यामुळे ज्यांनी या निविदा प्रक्रियेमध्ये भाग घेतला त्यांनी संताप व्यक्त केला असून जिल्हाधिकारी कार्तिकेयन यांच्याकडे तक्रार केली आहे शिवाय माहिती अधिकारात सर्व कागदपत्रे मागितले आहेत. विशेष म्हणजे दरमहा 3 लाख 55 हजार रुपये एवढी रक्कम देण्याबाबत हॉटेल सहारा यांनी निविदा भरली होती मात्र त्यांची निविदा डावलून दरमहा दोन लाख तीस हजार रुपये कोट करणाऱ्या नवनाथ इंदापुरे यांना याचा तीन वर्षाकरिता ठेका दिला आहे. अगोदर पुनीत बच्चू वार यांच्याकडे असलेला हा ठेका रद्द झाल्यामुळे आता इंदापुरे यांना हा ठेका दिला आहे. याबाबत वृत्तपत्रातून जाहीर प्रसिद्धीकरण करून टेंडर मागवण्यात आले होते. मात्र एकाही निविदाधारकासमोर टेंडर न उघडता कमी रक्कम देणाऱ्या नवनाथ इंदापुरे हे टेंडर मंजूर कसे केले याबाबत हरकत नोंदविण्यात आली आहे. 31 ऑगस्ट पर्यंत हे रेस्टॉरंट बंद राहील असे पत्र काढले असले तरीही प्रत्यक्षात ते कालपासून सुरू झाले आहे. यामुळे ऑफिसर क्लबचे चेअरमन तथा जिल्हाधिकारी कार्तिकेयेन या गंभीर बाबीची दखल घेऊन याची चौकशी करावी आणि चुकीच्या पद्धतीने टेंडर दिले असेल तर ते रद्द करावे अशी मागणी होत आहे.