अकोला : हालगी म्हणजे पारंपारिक लोककलेचा एक प्रकार, याला हजारो वर्षाची परंपरा आहे. कोणताही मंगल कार्याचा शुभारंभ असो, मिरवणूक असो, कुस्त्याचे मैदान असो, मोर्चा असो, आंदोलन असो, यात्रा असो अशा वेळी आवर्जून हालगी वादकाला बोलावून हालगी वादन केले जाते यामुळे कार्यक्रमात एक प्रकारचा जोष संचारला जातो.
माजी केंद्रीय गृहमंत्री सुशीलकुमार शिंदे साहेब, प्रदेश कार्याध्यक्षा आमदार प्रणितीताई शिंदे यांच्या मार्गदर्शनाखाली, काँग्रेसचे राष्ट्रीय नेते राहुलजी गांधी यांच्या नेतृत्वाखाली अकोला येथे निघालेल्या “भारत जोडो” यात्रेच्या स्वागतासाठी सोलापुर शहर भटक्या विमुक्त जाती जमाती संघटनेचे अध्यक्ष भारत जाधव यांच्या वतीने एक हालगी पथक सहभागी झाले होते. हालगी वाजविणारे कलावंत जोषात येऊन हालगी वाजवून “भारत जोडो” यात्रेचे वाजत गाजत स्वागत केले. यात्रेत सर्वांचे लक्ष वेधुन घेत चैतन्य निर्माण केले. कडाडणाऱ्या हालगी ला भारत जोडो यात्रेत सहभागी झालेले यात्री बघतच राहिले. हालगीचे वेगवेगळे प्रकार यावेळी सादर केले. हालगीच्या कड़कडाटाला अनेकांनी शिट्टया, टाळ्याने साथ देऊन ताल धरला यामुळे भारत जोडो यात्रेत सोलापुरची हालगी आकर्षणाचे केंद्र बनले होते. यात्रेत सहभागी झालेल्या अनेकांनी हालगी वादकांना शाबासकी दिली. या सोलापुरी हालगी च्या कड़कडाटाने भारत जोडो यात्रेत जोष निर्माण झाला होता.
यासाठी सोलापुर शहर काँग्रेसचे अध्यक्ष प्रकाश वाले, सोलापुर शहर भटक्या विमुक्त जाती जमाती संघटनेचे अध्यक्ष भारत जाधव, दशरथ गायकवाड, अरूणाताई वर्मा, सुभाष चव्हाण, देवाभाऊ गायकवाड़, चंदप्पा क्षेत्री, अरुण साठे, अनिल मस्के, यांच्यासह इतरांनी परिश्रम घेतले.
