गुटख्याच्या हफ्ता म्हणून फोन पे वरुन घेतले २५ हजार, पोलीस अधीक्षकांना कळताच निलंबन

संभाजीनगर : गुटख्याचा हफ्ता म्हणून फोन पे वरुन 25 हजार रुपये घेणाऱ्या एका पोलीस कर्मचाऱ्याला छत्रपती संभाजीनगर ग्रामीण पोलीस अधीक्षकांनी निलंबित केले आहे. सचिन भूमे असे या पोलीस कर्मचाऱ्याचे नाव आहे. पैठण डीवायएसपी पथकात असलेल्या या कर्मचाऱ्याने गेल्या काही दिवसांपासून तालुक्यात अक्षरशः धुमाकूळ घातला असल्याची चर्चा होती. आपण डीवायएसपी पथकात असून कारवाईची भीती दाखवत हा पोलीस कर्मचारी अनेकांकडून पैसे वसूल करत असल्याची चर्चा पोलीस दलात आहे. दरम्यान काही दिवसांपूर्वी त्याने गुटख्याचा हफ्ता म्हणून फोन पेवरुन 25 हजार रुपये घेतल्याची माहिती पोलीस अधीक्षकांना मिळाली होती. त्यानंतर चौकशी करुन त्याच्यावर निलंबनाची कारवाई पोलीस अधीक्षक मनिष कलवानिया यांनी केली आहे.