१६ नोव्हेंबरच्या आंदोलनाला व्यापक स्वरूप देण्याची तयारी; शेतकऱ्यांना मोठ्या संख्येने उपस्थित राहण्याचे आवाहन
येस न्यूज नेटवर्क : ऊस उत्पादक शेतकऱ्यांना न्याय्य ऊसदर मिळावा, यासाठी स्वाभिमानी शेतकरी संघटनेच्या वतीने सुरू असलेल्या आंदोलनाला व्यापक स्वरूप देण्यासाठी संघटनेचे पंढरपूर तालुकाध्यक्ष सचिन पाटील यांनी पुढाकार घेतला आहे. राजू शेट्टी यांच्याशी झालेल्या झालेल्या चर्चेनंतर ते पुन्हा ऊसदर आंदोलनात सहभागी झाले आहेत. आगामी १६ नोव्हेंबर रोजी होणाऱ्या ऊसदर आंदोलनाच्या पार्श्वभूमीवर पंढरपूरसह सोलापूर जिल्ह्यात गावोगावी गोंगडी बैठका घेऊन शेतकऱ्यांची मोट बांधली जात आहे.
ऊस उत्पादक शेतकऱ्यांच्या प्रश्नांवर चर्चा करताना उत्पादन खर्च, वाढती महागाई, मजुरी आणि ऊसाला मिळणारा दर याबाबत शेतकऱ्यांमध्ये जनजागृती केली जात आहे. आंदोलनात शेतकऱ्यांचा मोठा सहभाग असावा, यासाठी सचिन पाटील स्वतः गावोगावी बैठका घेऊन शेतकऱ्यांशी संवाद साधत आहेत.
याच अनुषंगाने गुरुवार, १२ नोव्हेंबर रोजी मंगळवेढा तालुक्यात गोंगडी बैठकांचे आयोजन करण्यात आले आहे. सकाळी ९ वाजता उचेठाण, ९.३० वाजता बाणण आणि १० वाजता बम्हपुरी येथे या बैठका होणार आहेत.
या बैठकांना राहुल धुले, युवराज धुले, शंकर संगशेट्टी, श्रीमंत केदार आणि अनिल बिराजदार यांची उपस्थिती राहणार आहे.
ऊसदराचा प्रश्न केवळ एखाद्या गावापुरता मर्यादित नसून संपूर्ण जिल्ह्यातील ऊस उत्पादक शेतकऱ्यांच्या आर्थिक हिताशी निगडित आहे. त्यामुळे शेतकऱ्यांनी पक्षीय मतभेद बाजूला ठेवून आपल्या हक्काच्या दरासाठी एकत्र यावे आणि १६ नोव्हेंबरच्या आंदोलनात मोठ्या संख्येने सहभागी व्हावे, असे आवाहन सचिन पाटील यांनी केले आहे.
गावोगावी सुरू असलेल्या गोंगडी बैठकांमुळे ऊसदर आंदोलनाची वातावरणनिर्मिती वेगाने होत असून, १६ नोव्हेंबरच्या आंदोलनात शेतकऱ्यांचा किती मोठा प्रतिसाद मिळतो यावर आंदोलनाची पुढची दिशा अवलंबून आहे
