आय कार्ड आणि कीट नसली तरी जनगणना करा…अन्यथा शिक्षकांवर गुन्हे !

सोलापूर शहर आणि जिल्ह्यात जनगणनेचे काम सुरू होऊन सात दिवस उलटले तरीही अनेक प्रगणक जनगणनेसाठी लागणाऱ्या कीट पासून वंचित आहेत. प्रगणकांना देण्यात येणाऱ्या किटमध्ये एक बॅग, टोपी, पेन, पेन्सिल, खोडरबर, शॉर्पनर, पॅड,पॅड क्लिप्स, एक नकाशा कागद, एक मार्कर पेन इत्यादी साहित्य दिले जाते.परंतु अद्यापही काही जणांना केवळ आणि केवळ एक मार्कर पेन, साधा पेन आणि पेन्सिल एवढेच साहित्य मिळाले आहे.आज ज्यांना साहित्य दिले गेले त्यांना ओळखपत्र म्हणून केवळ एक छापील कागद दिला आहे. गळ्यात अडकवण्याचा लेस दिली नाही.हा कागद शर्टला स्टेपल करून दारोदारी फिरायचं का असा संतप्त सवाल प्रगणकांनी केला आहे.प्रगणकाला आय कार्ड दिले नाहीत, एका -एका प्रगणकाला 200 घरे गणना करण्यासाठी दिली आहेत… जे मार्कर पेन दिले आहेत ते दहा ते 12 घरांवर खुणा केल्या की संपतात. ओळख पत्राशिवाय प्रगणक दारोदार फिरून जनगणना करत आहेत. उलट जनगणना वेळेत नाही केलात तर तुमच्यावर गुन्हा दाखल करू,.. अशी धमकी प्रगणकाच्या व्हाट्सअप ग्रुप वर अधिकारी देतात. बहुतांश प्रगणक हे शिक्षकच असल्यामुळे शिक्षकांमधून महापालिका अधिकाऱ्यांच्या वागण्याबद्दल संताप व्यक्त होत आहे.महापालिका झोन क्रमांक पाच मध्ये शुक्रवारी हा प्रकार पाहायला मिळाला.