केंद्रीय माध्यमिक शिक्षक मंडळातर्फे घेण्यात येणारी CTET परीक्षा पुढे ढकलण्यात आली आहे. राज्याची TET परीक्षा पेपरफुटीच्या प्रकरणामुळे लांबणीवर गेल्यानंतर आता केंद्राची CTET Exam 2026 परीक्षाही पुढे ढकलण्यात आली आहे. त्यामुळे गेल्या अनेक महिन्यांपासून परीक्षेची तयारी करणाऱ्या शिक्षकांमध्ये नाराजी आणि संभ्रमाचे वातावरण आहे.
केंद्रीय शिक्षक पात्रता परीक्षा अर्थात CTET परीक्षा 6 सप्टेंबर 2026 रोजी होणार होती. मात्र, या परीक्षेची नोंदणी करण्यापासून वंचित राहिलेल्या उमेदवारांना पुन्हा संधी देण्यासाठी परीक्षा पुढे ढकलण्याचा निर्णय घेण्यात आला आहे. अधिकाधिक पात्र उमेदवारांना परीक्षेत सहभागी होता यावे, या व्यापक दृष्टिकोनातून हा निर्णय घेण्यात आल्याचे सांगण्यात आले आहे.
मात्र, या निर्णयाचा फटका आधीपासून परीक्षेची तयारी करणाऱ्या शिक्षकांना बसत आहे. मागील अनेक महिन्यांपासून CTET आणि TET परीक्षेचा अभ्यास करणाऱ्या उमेदवारांना आता पुन्हा परीक्षेची तारीख आणि पुढील वेळापत्रकाची प्रतीक्षा करावी लागणार आहे.या परीक्षेसाठी नोंदणी न केलेल्या उमेदवारांना पुन्हा नोंदणी करण्याची संधी उपलब्ध करून देण्यात आली आहे ,त्यांना आता एक सप्टेंबर पर्यंत अर्ज करता येणार आहेत.
