गुन्हे शाखेची कामगिरी : दोन लाख ३८ हजारांचा मुद्देमाल जप्त
सोलापूर : दिवसा मजुरी करून रात्री घरफोड्या करणाऱ्या मजुराला गुन्हे शाखेच्या पोलिसांनी अटक केली आहे. त्याच्याकडून पाच घरफोड्या व दोन मोटारसायकलींचे सात गुन्हे उघडकीस आले असून, दोन लाख ३८ हजार ८५० रुपये किमतीचा मुद्देमाल जप्त करण्यात आला. १० जून रोजी ही कारवाई करण्यात आली.
शंकर ऊर्फ हांड्या ऊर्फ रवी मधुकर पवार (वय २२, रा. भंडारपायथा, येलवाडी, जुना टोलनाकाजवळ, देहूगाव पुणे, सध्या ढोक बाभूळगाव, ता. मोहोळ), असे अटक करण्यात आलेल्या मजुराचे नाव आहे. गुन्हे शाखेचे सहायक पोलिस निरीक्षक संजय क्षीरसागर व पथकातील हवालदार महेश शिंदे यांना बातमीदाराकडून एक इसम चोरीचे दागिने विक्री करण्यासाठी मोहोळवरून सोलापुरात येत असल्याची माहिती समजली. माहितीवरून गुन्हे शाखेच्या पथकाने जुना पुना नाका येथे सापळा रचला. तो मोटारसायकलवरून सोलापुरात येत असताना, त्याला जुना पुना नाका येथे पथकाने अडवले. ताब्यात घेऊन झडती घेतली असता, त्याच्याकडे एमआयडीसी पोलिस ठाण्यात दाखल झालेल्या चोरीच्या गुन्ह्यातील सोन्या चांदीचे दागिने मिळून आले. शिवाय त्याच्या जवळची मोटारसायकल वळसंग पोलिस ठाण्यात चोरीला गेल्याची नोंद असल्याचे निदर्शनास आले.
शंकर पवारची कसून चौकशी केली असता, त्याने शहरातील एमआयडीसी पोलिस ठाणे, फौजदार चावडी पोलिस ठाणे, सदर बझार पोलिस ठाण्याच्या हद्दीत पाच घरफोड्या केल्याची माहिती मिळाली. शिवाय वळसंग पोलिस ठाणे व अक्कलकोट उत्तर पोलिस ठाण्याच्या हद्दीत दोन मोटारसायकली चोरल्याचे लक्षात आले.
ही कारवाई पोलिस निरीक्षक सुनील दोरगे यांच्या मार्गदर्शनाखाली सहायक पोलिस निरीक्षक संजय क्षीरसागर, अमलदार महेश शिंदे, अनिल जाधव, कुमार शेळके प्रकाश गायकवाड, प्रवीण शेळकंदे , यांनी पार पाडली.
