भाजपकडून पुन्हा आ. विजयकुमार देशमुखांना ‘दे धक्का’ .. ‘उत्तर’ मध्ये आ.कोठेंचा वरचष्मा..!

सोलापूर जिल्ह्यातील मोहिते पाटील कुटुंब असो की सोलापुरातील दोन भाजपचे आमदार असोत त्यांना धक्क्यावर धक्के देण्याचे काम भाजपकडून सुरूच आहे. सोलापूर शहर उत्तर मतदार संघ हा भाजपचा आणि विजयकुमार देशमुख यांचा बालेकिल्ला समजला जातो. मात्र याच मतदारसंघात त्यांना डावलून त्यांच्या अनेक विरोधकांना सन्मानाने भाजप प्रवेश देणे सुरूच आहे. राष्ट्रवादी पक्षात असलेल्या सुमारे अर्धा डझनहून अधिक माजी नगरसेवकांना जे बहुतांश शहर उत्तर मध्ये आहेत, त्यांना काल रात्री भाजपमध्ये प्रवेश देण्यात आला. याबाबत खूप गुप्तता पाळण्यात आली. माजी नगरसेवक प्रथमेश कोठे, स्थायी समितीचे माजी सभापती विनायक कोंड्याल, माजी नगरसेविका कुमुद अंकाराम, माजी नगरसेवक विठ्ठल कोटा, शशिकांत कैंची, अक्षय वाकसे, तुषार पवार, युवराज सरवदे, संतोष सोमा, आकाश भोसले यांनी भाजपमध्ये प्रवेश केला. सोलापूर शहर मध्यचे आमदार देवेंद्र कोठे यांनी शहर उत्तरचे आमदार विजयकुमार देशमुख यांच्या मतदारसंघात पालकमंत्री जयकुमार गोरे आणि मुख्यमंत्री देवेंद्र फडणवीस यांच्या माध्यमातून मोठी घुसखोरी केली आहे. विडी घरकुल हा कोठे समर्थकांचा बालेकिल्ला समजला जातो मात्र हा भाग शहर उत्तर मध्ये आहे. इथले बारा ते पंधरा नगरसेवक कोठे समर्थक निवडून येतात. त्यामुळे त्यांना महापालिकेचे तिकीट देताना आता विजयकुमार देशमुख यांच्या कार्यकर्त्यांना तिकीट द्यायचे की आमदार देवेंद्र कोठे यांनी ज्यांना भाजपमध्ये आणले त्यांना तिकीट द्यायचे यावरून मोठा वाद निर्माण होणार आहे. यावर विजयकुमार देशमुख कोणती भूमिका घेतात याकडे लक्ष लागले आहे