सोलापूर : शहरातील सदर बझार व विजापूर नाका पोलीस ठाणे हद्दीतील सराईत गुन्हेगार, मुकेश ऊर्फ मुक्या किसनसिंग बोधीवाले (वय ३९ वर्षे) हा मागील काही वर्षापासून सातत्याने घातक शस्त्राचा वापर परिसरात दहशत माजवित होता. त्याच्याविरुध्द गंभीर स्वरुपाचे ०६ गुन्हे पोलीस आयुक्तालय हद्दीत दाखल आहेत. त्याच्याविरुद्ध एमपीडीए अन्वये स्थानबद्धतेची कारवाई करण्यात आलीय.
बेडरपूल लोधी गल्लीतील रहिवासी मुकेश उर्फ मुक्या किसनसिंग बोधीवाले हा घातक शस्त्रानिशी गैरकायद्याची मंडळी जमविणे, दगडफेक करणे, खंडणी मागणे, जबरी चोरी, इच्छापुर्वक दुखापत करणे, घराविषयीक आगळीक करणे, घरफोडी, खूनाचा प्रयत्न करणे, सरकारी कामात अडथळा निर्माण करणे, हयगयीने मानवी जीवनास धोका पोहचविणे, घातक शस्त्रांनी धमकवणे यासारखे गंभीर स्वरुपाचे गुन्हे साथीदारांच्या मदतीने, अवैध आर्थिक फायदा मिळवण्यासाठी करीत आला आहे.
त्याचे या गुन्हेगारी कृत्यामुळे सार्वजनिक सुव्यवस्थेस बाधा निर्माण झाली आहे. मुकेश ऊर्फ मुक्या किसनसिंग बोधीवाले याच्या गुन्हेगारी कृत्यामुळे, त्याची सोलापुर शहरातील व्यापारी व सामान्य नागरीकांमध्ये दहशत असुन त्याच्याविरुध्द सामान्य नागरीक उघडपणे पोलीसांना माहीती देत नाहीत, असं पोलिसांचं मत आहे.
मुकेश ऊर्फ मुक्या किसनसिंग बोधीवाले यास त्याच्या गुन्हेगारी कारवायापासून परावृत्त करण्यासाठी सन २०२३ मध्ये क. ११० फौ. प्र. सं. अधिनियमानुसार प्रतिबंधक कारवाई करण्यात आली होती. त्यानंतरही त्याच्या वर्तनात कोणताच बदल झाला नाही. आणि त्याने सार्वजनिक सुव्यवस्थेस बाधा होईल, अशी गुन्हेगारी कृत्य चालू ठेवली. त्यामुळे त्याचे गुन्हेगारी कृत्यास वेळीच प्रतिबंध करण्यासाठी, पोलीस आयुक्त एम. राजकुमार यांनी सोमवारी, २२ एप्रिल रोजी त्याच्याविरुध्द एमपीडीए अधिनियम, १९८१ चे कलम ३ अन्वये स्थानबध्दतेचे आदेश निर्गमित करुन, त्यास मंगळवारी स्थानबध्द आदेशाची बजावणी करुन, येरवडा कारागृह, पुणे येथे दाखल करण्यात आले.
ही कारवाई पोलीस आयुक्त एम. राज कुमार यांच्या मार्गदर्शनाखाली पोलीस उप-आयुक्त (गुन्हे/विशा) डॉ. दीपाली काळे, पोलीस उप-आयुक्त (परिमंडळ) विजय कबाडे, सहाय्यक पोलीस आयुक्त (गुन्हे) प्रांजली सोनवणे, सहाय्यक पोलीस आयुक्त (विभाग-०२) अजय परमार, वरिष्ठ पोलीस निरीक्षक (गुन्हे) सुनिल दोरगे, वपोनि (सदर बझार पोलीस ठाणे) अजित लकडे, पोउपनि/विशेंद्रसिंग बायस (गुन्हे शाखा), एमपीडीए पथकातील अंमलदार पोहेकॉ-/८३३ विनायक संगमवार, पोहेकॉ/१२५४ सुदीप शिंदे, पोशि/१९१६ अक्षय जाधव, पोशि/६५४ विशाल नवले यांनी पार पाडली.
