सोलापूर : उप प्रादेशिक परिवहन कार्यालय सोलापूर या कार्यालयात लवकरच दुचाकी वाहनांसाठी नवीन मालिका सुरु करण्यात येत आहे. नवीन सुरु होणाऱ्या MH 13 EE मालिकेतील आकर्षक नोंदणी क्रमांक राखून ठेवण्याकरिता दिनांक 17 मे 2023 पासूण अर्ज स्विकारण्याची प्रक्रिया सुरु करण्यात आली असल्याची माहिती उप प्रादेशिक परिवहन अधिकारी, सोलापूर यांनी दिली.
वाहनांची नवीन मालिका चालू होण्याच्या दिवशी उप प्रादेशिक परिवहन कार्यालया गर्दी होते. त्यामुळे कार्यालयीन व्यवस्थेवर त्याचा ताण पडतो व नागरिकांनाही याचा त्रास होतो. नागरिकांना होणारा त्रास कमी व्हावा व त्यांना हवा असणारा आकर्षक नोंदणी क्रमांक उपलब्ध असल्यास त्यांना सुलभतेने मिळावा. यासाठी ज्या दुचाकी वाहन मालकांना आकर्षक तसेच पसंतीचे क्रमांक विहीत शुल्क भरून हवे असतील त्यांनी दिनांक 17 ते 19 मे 2023 या कालावधीत कार्यालयीन कामकाजाच्या दिवशी सकाळी 11.00 ते दुपारी 3.00 या वेळेत विहीत नमुन्यातील अर्ज सादर करावा. कार्यालयाच्या नवीन नोंदणी विभागात डीडी , पत्याचा पुरावा, ओळखपत्र, पॅनकार्डच्या साक्षांकित प्रतीसह जमा करावा, डीडी फक्त ” Dy R.T.O. Solapur यांच्या नावे नॅशनलाईज अथवा शेड्युल्ड बँकेचा असावा.अर्जासोबत केंद्रिय मोटार वाहन नियम १९८९ च्या नियम ४ तसेच महाराष्ट्र मोटार वाहन नियम १९८९ च्या नियम 5 अ मध्ये विहीत केलेल्या पत्त्याच्या पुराव्याची (उदा. आधार कार्ड, टेलिफोन बील इ.) साक्षांकित प्रत सादर करणे आवश्यक असेल.
एक नंबरकरिता एकापेक्षा जास्त अर्ज आल्यास त्यांची यादी दिनांक 22 मे 2023 रोजी सकाळी 11.00 वाजता कार्यालयीन नोटीस बोर्डवर लावण्यात येईल. यादीतील अर्जदारांना लिलावाकरिता जर जास्त रक्कमेचा डीडी जमा करावयाचा असेल त्यांनी दि. 23 मे 2023 रोजी सीलबंद लिफाफ्यात कार्यालयात कार्यालयीन वेळेत जमा करावा. लिलावासाठी सादर केलेला डीडी रुपये 300/- पेक्षा कमी रकमेचा नसावा. दिनांक 23 मे 2023 रोजी सायंकाळी 04.00 वाजता उप प्रादेशिक परिवहन अधिकारी, सोलापूर, यांच्या उपस्थितीत पात्र व्यक्तीसमोर (संबंधित अर्जदार) लिफाफे उघडून ज्या अर्जदाराचे विनिर्दिष्ट शुल्कापेक्षा जास्तीत जास्त रकमेचा डीडी सादर केला असेल त्यास नमूद पसंती क्रमांक वितरीत केला जाईल.
एकदा राखून ठेवलेला नोंदणी क्रमांक बदलून देता येणार नाही. नोंदणी क्रमांक राखून ठेवलेल्या दिनांकापासून 30 दिवसांच्या आत नोंदणीसाठी वाहन सादर करून वाहन क्रमांक प्राप्त करून घ्यावा अन्यथा राखून ठेवलेला नोंदणी क्रमांक आपोआप रद्द होईल व फी सरकारजमा होईल. कोणताही विशिष्ट नोंदणी क्रमांक राखीव ठेवण्यासाठी प्रदान केलेली फी कोणत्याही परिस्थितीत परत करता येणार नाही अथवा त्याचे समायोजन करता येणार नाही. असेही उप प्रादेशिक परिवहन अधिकारी, सोलापूर यांनी पत्रकान्वये कळविले आहे.
