सोलापूर : श्री सिद्धेश्वर फाउंडेशनने हिंदुस्थानी शास्त्रीय संगीताचा प्रचार आणि प्रसार करण्यासाठी जुळे सोलापुरातील द्वारकाधीश मंदिरात शास्त्रीय संगीत संमेलन आयोजित केल्याची माहिती श्री सिद्धेश्वर फाउंडेशनचे अध्यक्ष सिद्धार्थ सर्जे यांनी दिली.
अनेक युवकांनी आपले संपूर्ण आयुष्य हिंदुस्थानी शास्त्रीय संगीतासाठी बाहिले आहे. हिंदुस्थानी शास्त्रीय संगीताची साधना करणाऱ्या प्रतिभावान युवा कलाकारांचे हे संमेलन आहे. रविवार दिनांक १६ नोव्हेंबर २०२५ रोजी संध्याकाळी साडेपाच वाजता संमेलन सुरू होईल. सर्वप्रथम आंतरराष्ट्रीय कीर्तीचे सुंदरी वादक भीमण्णा जाधव यांचे सुपुत्र व्यंकटेशकुमार आणि सुकन्या कलाश्री यांचे सुंदरी वादन होईल. त्यांना तबल्याची साथ नितीन दिवाकर करणार आहेत. सोलापूरचे युवा उद्योजक आणि सतार वादक ऋषिकेश नागावकर यांचे सतार वादन होईल. त्यांना तबल्याची साथ डॉ. अनिल सर्जे करणार आहेत. सद्गुरू दंडवते महाराजांच्या परंपरेतील प. पू. गोविंदराज दंडवते यांच्या सुकन्या देवत्री यांचे शास्त्रीय गायन होईल. यांना तबल्यावर नितीन दिवाकर तर हार्मोनियम वर ओंकार पाठक साथ देणार आहेत.
या कार्यक्रमाचे उद्घाटन विभीषण चवरे, संचालक, सांस्कृतिक कार्य संचालनालय, महाराष्ट्र यांच्या शुभहस्ते होणार आहे. अध्यक्षस्थानी डॉ. माधवी रायते तर प्रमुख पाहुणे म्हणून उद्योजक सिद्धेश्वर पाटील असणार आहेत. सोलापूर शहर व जुळे सोलापुरातील सर्व रसिकांनी या कार्यक्रमाचा लाभ घ्यावा असे आवाहन श्री सिद्धेश्वर फाउंडेशनचे संगीत विभाग प्रमुख नितीन दिवाकर यांनी केले आहे. या पत्रकार परिषदेला श्री सिद्धेश्वर फाउंडेशनचे शिक्षण विभाग प्रमुख राजेंद्र बलसुरे, आरोग्य विभाग प्रमुख ममता कुलकर्णी, क्रीडा विभाग प्रमुख धनश्री देशपांडे, अन्नपूर्णा योजना प्रमुख सीमा खोडके उपस्थित होते.
