नऊ वर्षे बॉम्ब शोधक पथकाची विश्वासू साथीदार! ‘मिरा’ श्वान सेवेतून निवृत्त

सोलापूर पोलिसांच्या श्वान पथकातील ‘मिरा’ला निरोप; पोलीस अधिकाऱ्यांच्या उपस्थितीत सेवापूर्ती सोहळा

सोलापूर : बॉम्ब शोधक व नाशक पथकातील अत्यंत विश्वासू आणि कर्तव्यदक्ष सहकारी म्हणून ओळखल्या जाणाऱ्या ‘मिरा’ या श्वानाचा नऊ वर्षांच्या प्रदीर्घ सेवेनंतर सेवापूर्ती सोहळा शुक्रवारी (दि. १३ नोव्हेंबर) पार पडला. पोलीस आयुक्तालयाच्या वतीने आयोजित या सोहळ्यात मिराला सन्मानपूर्वक निरोप देण्यात आला.

सन २०१७ मध्ये सोलापूर शहर बॉम्ब शोधक व नाशक पथकात दाखल झालेल्या मिराने महाराष्ट्रातील पहिल्या बेल्जियन शेफर्ड प्रजातीच्या श्वानांमध्ये स्थान मिळवले होते. दहशतवादी कारवाया, बॉम्बस्फोटाच्या धमक्या आणि महत्त्वाच्या बंदोबस्ताच्या ठिकाणी स्फोटकांचा शोध घेण्याची जबाबदारी मिराने समर्थपणे पार पाडली.

सन २०१८ व २०१९ मध्ये MSPDM अंतर्गत आयोजित स्पर्धांमध्ये मिराने उत्कृष्ट कामगिरी करत गोल्ड मेडल पटकावले होते. तसेच लखनौ येथील AIPDM प्रशिक्षणादरम्यानही तिने उल्लेखनीय कामगिरी केली.

सोलापूर शहरासह महाराष्ट्रातील विविध ठिकाणी बंदोबस्त, महत्त्वाच्या व्यक्तींचे दौरे, धार्मिक कार्यक्रम आणि संवेदनशील ठिकाणी तपासणी करताना मिराने मोलाची भूमिका बजावली. विशेषतः सोलापूर शहरातील दैनंदिन वाहतूक व गर्दीच्या ठिकाणी सुरक्षेच्या दृष्टीने तिचे योगदान महत्त्वपूर्ण ठरले.
सेवापूर्तीनंतर मिराच्या देखभालीची जबाबदारी तिच्या हँडलरकडे देण्यात आली आहे. शासनाच्या नव्या आदेशानुसार निवृत्त श्वानांच्या देखभालीसाठी आवश्यक खर्चाची तरतूद करण्यात आली आहे.

या सेवापूर्ती सोहळ्यास पोलीस उपआयुक्त डॉ. अश्विनी पाटील, सहाय्यक पोलीस आयुक्त मनोजकुमार यादव, दिलीप पवार यांच्यासह पोलीस अधिकारी, श्वान पथकातील कर्मचारी उपस्थित होते.

नऊ वर्षे पोलिसांची विश्वासू साथीदार राहिलेल्या मिराच्या कार्याचा गौरव करत तिला सन्मानपूर्वक निरोप देण्यात आला.