उद्या कोजागिरी.! लोंढेच्या -लोंढे पायी चालत निघाले तुळजापूरकडे..!

उद्या तुळजापुरात कोजागिरी पौर्णिमेचा उत्सव होणार आहे. यासाठी खूप मोठ्या प्रमाणावर भाविक विशेषता कर्नाटकातील भावीक सोलापूर मार्गे पायी चालत तुळजापूरकडे निघाले आहेत. कर्नाटकातील बहुतांश भागातून गेली तीन दिवस हे भाविक चालत सोलापुरात आले. सोलापुरातील सात रस्ता -जिल्हा परिषद – मधला मारुती – बलिदान चौक रूपा भवानी मंदिर या मार्गावरून प्रचंड मोठ्या प्रमाणावर भाविकांचे लोंढेच्या लोंढे तुळजापूरकडे निघाले आहेत. उद्या तुळजापुरात होणाऱ्या कोजागिरी महोत्सवासाठी सुमारे 9 ते 10 लाख भाविक येतील असा अंदाज आहे. आजच दुपारपर्यंत सुमारे दीड ते पावणेदोन लाख भाविक आल्याचे सांगण्यात येत होते. रूपा भवानी पासून तुळजापूर कडे जाणारा महामार्ग वाहतुकीसाठी कालपासूनच बंद करण्यात आला आहे. या पायी चालत जाणाऱ्या भाविकांसाठी सोलापुरातील विविध दानशूर लोकांनी तसेच संघटनांनी चहापाणी तसेच नाश्त्याची सोय केली आहे. आज सायंकाळ नंतर सोलापूर शहर आणि पंचक्रोशीतील भाविक मोठ्या प्रमाणावर तुळजापूरकडे चालण्यासाठी निघतात. तुळजापुरातील वाहतूक ईटकळ तसेच बार्शी मार्गे वळविण्यात आले आहे. एकूणच पायी चालत जाणाऱ्या भाविकांना आता तुळजाभवानी मातेच्या दर्शनाचे वेध लागले आहेत.