सोलापुरातील साखर कारखानदारांच्या गुप्त बैठकीची चर्चा; शेतकरी संघटना पाच हजार दारावर ठाम.
येस न्यूज मराठी नेटवर्क : यंदाचा ऊस गाळप हंगाम लवकर सुरू केल्याने साखरेचा उतारा (रिकव्हरी) कमी मिळत असल्याचे कारण पुढे करत, उसाला प्रतिटन तीन हजार रुपयांपेक्षा अधिक दर देणे परवडत नसल्याची भूमिका साखर कारखानदारांकडून मांडली जात असल्याची चर्चा आहे. या पार्श्वभूमीवर सोलापूर जिल्ह्यातील साखर कारखानदारांच्या कथित गुप्त बैठकीबाबत चर्चांना उधाण आले आहे.
यंदाच्या गळीत हंगामात साखरेचा उतारा किती मिळतो, साखरेचे बाजारभाव काय राहतात आणि कारखान्यांचे आर्थिक गणित कसे जुळते, यावर उसाचा दर अवलंबून राहणार असल्याचे कारखानदारांचे म्हणणे असल्याचे सांगितले जात आहे. हंगाम लवकर सुरू झाल्यामुळे सुरुवातीच्या काळात रिकव्हरी कमी मिळत असल्याचा मुद्दा कारखानदारांकडून पुढे केला जात आहे. शिवाय बहुतांश ऊस खोडवा अवस्थेतील असून त्याला वर्षही पूर्ण झाले नसल्याने रिकवरी मार खाणार आहे त्यामुळे दर वाढवून कसा द्यावा हा मुद्दा कारखानदारांनी पुढे केला आहे.
मात्र, दुसरीकडे ऊस उत्पादक शेतकऱ्यांना ऊस लागवडीपासून तोडणीपर्यंत मोठा खर्च करावा लागतो. मशागत, बेणे, लागवड, खते, औषधे, पाणी आणि मजुरीच्या वाढत्या खर्चामुळे शेतकऱ्यांचे आर्थिक गणित बिघडत आहे. अल निनोमुळे पाऊस अत्यल्प झाल्याने ऊसाचे उत्पादन प्रचंड घटले आहे. त्यामुळे उसाला प्रतिटन 50000दर द्यावा. कारखानदारांची बाजू लक्षात घेऊन सारखेची आधारभूत किंमत 50 रुपये करावी परंतु शेतकऱ्यांचे नुकसान कदापी सहन करणार नसल्याचे शेतकरी संघटनांनी सांगितले आहे.
ऊसदराच्या संघर्षाची चिन्हे?
साखर कारखानदारांकडून रिकव्हरी आणि उत्पादन खर्चाचा मुद्दा पुढे केला जात असताना, शेतकरी संघटनांकडून मात्र उसाला उत्पादन खर्चावर आधारित रास्त दर मिळावा, अशी मागणी होण्याची शक्यता आहे. त्यामुळे आगामी काळात ऊसदराचा प्रश्न तापण्याची चिन्हे आहेत. यंदा उसाला प्रतिटन किती दर मिळणार याकडे जिल्ह्यातील ऊस उत्पादक शेतकऱ्यांचे लक्ष लागले आहे.
