राष्ट्रव्यापी अभियानास सोलापूर जिल्ह्यात सुरुवात, 31 ऑक्टोबर पर्यंत सूचना पाठवाव्यात -जिल्हाधिकारी एस. कार्तिकेयन
सोलापूर: नागरिकांच्या सहभागातून प्रशासकीय, प्रक्रियात्मक, तांत्रिक व संरचनात्मक सुधारणा सुचविणे, त्यांचे परीक्षण करणे व त्यांची कालबद्ध अंमलबजावणी करण्यासाठी राबविण्यात येणाऱ्या “सुधारणा उत्सव (Reform Utsav)-2026” या राष्ट्रव्यापी अभियानाची महाराष्ट्र राज्यात अंमलबजावणी करण्यात येत आहे. या अभियानाची सुरुवात सोलापूर जिल्ह्यात ही होत असल्याने अभियानात जास्तीत जास्त नागरिकांनी सहभागी होऊन शासकीय सेवांमधील त्रुटींबाबत सुधारणा सुचवाव्यात, असे आवाहन जिल्हाधिकारी एस. कार्तिकेयन यांनी केले आहे.
दि. 1 सप्टेंबर 2026 च्या सामान्य प्रशासन विभागाच्या शासन निर्णयान्वये हे अभियान राबविले जात आहे. सदर अभियानाचा मुख्य उद्देश नागरिकांच्या अनुभवातून शासकीय सेवा वितरणातील त्रुटी, अनावश्यक प्रक्रिया, अनुपालनाचा भार व कागदपत्रांची पुनरावृत्ती कमी करून शासकीय सेवा अधिक सुलभ, गतिमान व पारदर्शक करणे हा आहे. या अभियानांतर्गत सर्व प्रशासकीय विभागांशी संबंधित नियम, सेवा वितरण, परवाने, मंजुरी, डिजिटल प्रणाली, आंतर-विभागीय कार्यपद्धती आणि संस्थात्मक रचना यांवर भर देण्यात येणार आहे. जिल्हास्तरीय प्रशासकीय यंत्रणेचे अभियानाची उद्दिष्टे, कार्यपद्धती, पोर्टलचा वापर, सुधारणा निकष, विभागीय जबाबदाऱ्या आणि केंद्र शासनाशी समन्वय याबाबत संवेदनीकरण करण्यात येईल.
या मोहिमेसाठी डिजिटल माध्यमे, सामाजिक माध्यमे, प्रसारमाध्यमे, ग्रामपंचायत व स्थानिक स्वराज्य संस्थांची यंत्रणा, शैक्षणिक संस्था, उद्योग व व्यावसायिक संघटना, स्वयंसेवी संस्था तसेच इतर संबंधित भागधारकांचा उपयोग करण्यात यावा. नागरिकांकडून सुधारणा सूचना “रिफॉर्म उत्सव” पोर्टल तसेच अधिकृत मदत कक्षामार्फत स्वीकारण्यात याव्यात. प्रत्येक सूचनेची डिजिटल नोंदणी करून तिला अद्वितीय क्रमांक देण्यात येईल. नागरिकांकडून सूचना स्वीकारण्याची प्रक्रिया दि. 31 ऑक्टोबर 2026 रोजी रात्री 12:00 वाजता बंद करण्यात येईल. न्यायालयीन किंवा न्यायाधिकरणीय विचाराधीन बाबींमध्ये न्यायालयीन कार्यवाहीवर परिणाम होईल अशी कोणतीही कार्यवाही सुधारणा उत्सव अभियानाच्या माध्यमातून करण्यात येऊ नये, असे आवाहन सर्व विभागप्रमुखांना करण्यात येत आहे, असे जिल्हाधिकारी कार्तिकेयन यांनी सांगितले.
