येस न्युज मराठी नेटवर्क : पाट्यांवर किंवा एखाद्या पर्यटनस्थळी फिरताना कोणीतरी आपल्याकडून किंवा आपण कोणाकडून तरी फोटो काढून घेतला असल्याची आठवण अनेकांकडे असेल. राज्याचे सार्वजनिक बांधकाम राज्यमंत्री दत्तात्रय भरणे यांनी नुकताच असा अनुभव घेतला.
मुंबईत सध्या राज्य विधिमंडळाचे दोन दिवसीय अधिवेशन सुरू आहे. त्यासाठी राज्यभरातील आमदार व मंत्री मुंबईत आहेत. सोमवारी विधिमंडळाचे कामकाज आटपून दत्तात्रय भरणे हे आमदार आशुतोष काळे व अन्य काही जणांसोबत संध्याकाळी मरीन ड्राइव्हला फेरफटका मारत होते. अचानक काही मुलांनी त्यांना आवाज दिला आणि आमचा सर्व मित्रांचा एक फोटो काढा, अशी विनंती केली. त्यांच्या विनंतीला मान देऊन भरणे यांनी आनंदानं त्या मुलांचे फोटो काढले व त्यांच्या जीवनातील अनमोल क्षण कैद केले. हे सर्व सुरू असताना आमदार आशुतोष काळे यांनी अचानक भरणे यांचाही फोटो काढला.
‘फोटो काढून झाल्यावर मुलांना समजले की आपला फोटो काढणारे महाराष्ट्र राज्याचे सार्वजनिक बांधकाम राज्यमंत्री आहेत. त्यानंतर या मुलांनी व त्यांच्यासोबतच्या मोठ्यांनी भरणे यांच्यासोबत एक फोटो काढण्याची विनंती केली. त्यानंतर सर्वांनी मिळून एक फोटो काढला.
भरणे यांनी स्वत: ट्विटरवरून हा किस्सा शेअर केला आहे. ‘या प्रसंगामुळं मला माझे तरुण असतानाचे मित्रांच्या सोबतचे दिवस आठवले. या लहान मुलांच्या आनंदात मला सहभागी होता आले याचा मनापासून आनंद वाटला,’ असं त्यांनी म्हटलं आहे.
