पंढरपूर- आषाढी यात्रा २०२६ च्या पार्श्वभूमीवर महाद्वार घाट ते महाद्वार पोलीस चौकीपर्यंतच्या परिसरात दि. २४/०७/२०२६ सकाळी ०८.०० ते दि. २६/०७/२०२६ रात्री ०८.०० वाजेपर्यंत पेढेवाले, फुले विक्रेते, हार विक्रेते, फोटो विक्रेते, प्रसाद विक्रेते व हातगाडीवाले यांना साहित्य विक्री करण्यास मनाई करण्यात आली आहे. उपविभागीय दंडाधिकारी सचिन इथापे यांनी भारतीय नागरीक सुरक्षा संहिता २०२३ च्या कलम १६३ (२) अन्वये हा आदेश जारी केला आहे.
वरिष्ठ पोलीस निरीक्षक, पंढरपूर शहर पोलीस ठाणे यांनी पत्र क्र. ४१६/२०२६ दि. ११/०६/२०२६ अन्वये कळविले होते की, यात्रा कालावधी दि. १५/०७/२०२६ ते २९/०७/२०२६ असून एकादशी दिवशी महाद्वार घाट ते महाद्वार चौक परिसरात दर्शनासाठी भाविकांची मोठी गर्दी होते. महाद्वार घाट परिसरात पेढे, फुले, हार व इतर पूजेचे साहित्य विक्रीसाठी विक्रेते थांबतात. त्यामुळे गर्दीवर नियंत्रण ठेवण्यासाठी रस्सीचा वापर करावा लागतो व गर्दी एकाच ठिकाणी थांबून चेंगराचेंगरीसारखा प्रकार होण्याची तसेच मानवी जीविताला धोका निर्माण होण्याची शक्यता आहे.
या पार्श्वभूमीवर कायदा व सुव्यवस्था राखण्यासाठी महाद्वार चौक ते महाद्वार पोलीस चौकी या ठिकाणी तीन दिवस साहित्य विक्रीस प्रतिबंध करावा, अशी विनंती करण्यात आली होती. त्यानुसार उपविभागीय दंडाधिकाऱ्यांनी सदर आदेश पारित केला आहे.
