उत्तम समाजव्यवस्थेसाठी शक्तीस्थळांच्या बळकटीची आवश्यकता

पालकमंत्री जयकुमार गोरे : बसवरत्न पुरस्कारांचे थाटात वितरण

सोलापूर : महापुरुषांची स्मारके आपल्या समाजाची शक्तीस्थळे आहेत. उत्तम समाजव्यवस्थेसाठी या शक्ती स्थळांच्या बळकटीची आवश्यकता आहे. त्यामुळेच ४०० कोटी रुपये खर्चून २२ एकर जागेत महात्मा बसवेश्वर महाराजांचे भव्य स्मारक करण्यात येत आहे, असे प्रतिपादन पालकमंत्री जयकुमार गोरे यांनी केले. मध्यवर्ती श्री महात्मा बसवेश्वर जन्मोत्सव व समाजसेवा महामंडळातर्फे शुक्रवारी फडकुले सभागृहात राज्यस्तरीय बसवरत्न पुरस्कारांचे वितरण पालकमंत्री जयकुमार गोरे यांच्या हस्ते झाले.

याप्रसंगी व्यासपीठावर आमदार देवेंद्र कोठे, महापौर विनायक कोंड्याल, कार्यक्रमाचे अध्यक्ष शिवचरित्र व्याख्याते डॉ. शिवरत्न शेटे, माजी खासदार अमर साबळे, ट्रस्टी अध्यक्ष जगदीश पाटील, सचिव बसवराज सावळगी, उत्सव अध्यक्ष शरणराज केंगनाळकर, भाजपाचे जिल्हाध्यक्ष शशिकांत चव्हाण, जि. प. चे सभापती रामप्पा चिवडशेट्टी, ट्रस्टी रेवणसिद्ध आवजे, सुदीप चाकोते,
केदार वनारोटे, गणेश चिंचोली, आनंद मुस्तारे, अक्षय अंजिखाने, किसन जाधव उपस्थित होते.

यावेळी हृदयरोग तज्ञ डॉ. शैलेश पाटील ( वैद्यकीय क्षेत्र), महादेव बुक्कानुरे ( सामाजिक क्षेत्र), पंडित जवळकोटे (बांधकाम व्यवसायिक), अनुप्रिता अंदेली (सामाजिक क्षेत्र), सदाशिव पडदुणे (सामाजिक क्षेत्र), सिद्धेश्वर पाटील (सामाजिक क्षेत्र), संतोष पाटील (सामाजिक क्षेत्र) डॉ. दीपिका चिंचोळी (वैद्यकीय क्षेत्र), राजश्री थळंगे (सामाजिक क्षेत्र) प्रा. गायत्री बिराजदार (शैक्षणिक क्षेत्र), रूपा स्वामी (सामाजिक क्षेत्र ) यांना बसवरत्न पुरस्कार देऊन गौरविण्यात आले. सन्मानचिन्ह आणि शेला असे पुरस्काराचे स्वरूप होते. यावेळी लिंगायत समाजाचे नवनिर्वाचित नगरसेवक, जिल्हा परिषद सदस्य, सभापती यांचाही बसव सन्मानपत्र देऊन सन्मान करण्यात आला.

पालकमंत्री जयकुमार गोरे म्हणाले, महात्मा बसवेश्वरांचे स्मारक सर्वार्थाने उत्तम व्हावे याकरिता अभ्यास गटाची स्थापना करण्यात येणार आहे. हा अभ्यास गट बसवकल्याणसह विविध ठिकाणी भेटी देऊन पाहणी करून अभ्यास करणार आहे. त्यानुसार स्मारकाची रचना करण्यात येणार आहे. नियोजित स्मारकाच्या १५ एकराच्या जागे शेजारी असलेले सात एकर तळेदेखील महात्मा बसवेश्वर स्मारकाला देण्यात येणार असल्याचेही पालकमंत्री जयकुमार गोरे यांनी याप्रसंगी सांगितले.

महामंडळाचे उत्सव अध्यक्ष शरणराज केंगनाळकर यांनी स्वागत केले. ट्रस्टी अध्यक्ष जगदीश पाटील यांनी प्रास्ताविक तर भैरवनाथ कानडे यांनी सूत्रसंचालन केले.

बसवेश्वर स्मारक मंजूर केल्याबद्दल पालकमंत्र्यांचा नागरी सत्कार

मंगळवेढा येथे नियोजित महात्मा बसवेश्वर स्मारकासाठी १५ एकर जमीन आणि ४०० कोटी रुपयांचा निधी तसेच सोलापुरातील बसवेश्वर सर्कल येथील महात्मा बसवेश्वर पुतळा सुशोभीकरणासाठी एक कोटी रुपयांचा निधी मंजूर केल्याबद्दल वीरशैव लिंगायत समाज व मध्यवर्ती महामंडळाच्यावतीने पालकमंत्री जयकुमार गोरे यांचा नागरिक सत्कार करण्यात आला. मानपत्र, म्हैसूर पगडी, शेला आणि पुष्पहार घालून पालकमंत्री जयकुमार गोरे यांना सन्मानित करण्यात आले.

महात्मा बसवेश्वर हे अर्थक्रांतीचे प्रणेते

जगतज्योती महात्मा बसवेश्वर यांनी त्यांच्या शिकवणुकीतील समाजामध्ये आर्थिक क्रांती घडवून आणली. गोरगरिबांना कायकवे कैलास अर्थात काम हाच कैलास आहे याची शिकवण दिली. त्या अर्थाने महात्मा बसवेश्वर हे जगातील पहिले अर्थशास्त्रज्ञ होते. आर्थिक क्रांतीचे उद् गाते होते, असे गौरवोद्गार शिवचरित्र व्याख्याते डॉ. शिवरत्न शेटे यांनी याप्रसंगी काढले.