सोलापूर : जुनी लक्ष्मी चाळ येथील श्री महादेव मंदिर परिसरात कार्यरत असलेल्या श्री संत ज्ञानेश्वर महाराज वारकरी सांप्रदायिक मृदंग वादन शिक्षण संस्थेने यंदाही उल्लेखनीय यश संपादन केले आहे. अखिल भारतीय गंधर्व महाविद्यालय, मुंबई यांच्या २०२५ सालच्या मृदंग वादन परीक्षेचा निकाल शंभर टक्के लागला असून, सलग सात वर्षे ही परंपरा कायम राखण्यात संस्थेला यश आले आहे.
या यशाबद्दल बोलताना अखिल भाविक वारकरी मंडळाचे राष्ट्रीय अध्यक्ष ह.भ.प. सुधाकर महाराज इंगळे यांनी संस्थेच्या कार्याचे कौतुक केले. ते म्हणाले की, या संस्थेमध्ये शास्त्रीय मृदंग वादनाबरोबरच वारकरी संप्रदायातील मृदंग वादनाचेही सखोल प्रशिक्षण दिले जाते. भजन, कीर्तन आणि भारुड यामध्ये मृदंगाची प्रभावी साथ कशी करावी, याचे उत्कृष्ट मार्गदर्शन येथे मिळते, त्यामुळे संस्थेचे कार्य खरोखरच उल्लेखनीय आहे.
या कार्यक्रमाला प्रमुख पाहुणे म्हणून जिल्हाध्यक्ष विश्व हिंदू परिषद ह.भ.प. अभिमन्यू महाराज डोंगरे, संगीत विशारद ह.भ.प. संभाजी घुले, ह.भ.प. चंद्रकांत जांभळे आणि ह.भ.प. भागवत जाधव उपस्थित होते. यावेळी परीक्षेत उत्तीर्ण झालेल्या विद्यार्थ्यांना प्रमाणपत्रांचे वितरण करण्यात आले.
कार्यक्रमाचे सूत्रसंचालन ह.भ.प. यशांक सुरवसे यांनी केले. प्रस्तावना अखिल भाविक वारकरी मंडळाचे प्रदेश अध्यक्ष ह.भ.प. ज्योतीराम महाराज चांगभले यांनी मांडली, तर आभार प्रदर्शन ह.भ.प. गणेश चांगभले यांनी केले.
कार्यक्रमाच्या यशस्वी आयोजनासाठी संगीत विशारद प्रणिती चांगभले, ओम माशाळ, आदित्य इंगळे, दक्ष वारे, गणेश शेटे, केशव परबत आणि योगीनाथ सुरवसे यांनी विशेष सहकार्य केले.
