उत्साही वातावरणात पार पडलेल्या ‘सोलापूर १० के रन’ मध्ये धावपटूंनी आपल्या वेगवान यशाची छाप पाडली . भारतीय सैन्य दलातील महार रेजिमेंटमध्ये कार्यरत असणारा जवान लहू चंदनशिवे हा पुरुषांच्या १० किमी गटात विजेतेपदाचा ‘किंग’ ठरला. किताब पटकावला, तर महिलांमध्ये जिल्हा परिषद शाळा एसआरपी कॅम्पची इयत्ता दहावीतील विद्यार्थीनी आरोही पाटमस ही १० किमी गटाची विजेतेपदाची ‘क्वीन’ ठरली. यासोबतच ५ किमी गटात पुरूषांमध्ये तरूणाईने जलवा दाखवताना वैभव पाटील याने प्रथम क्रमांक पटकावत या गटाचा तो बादशहा असल्याचे दाखवून दिले. महिलांच्या गटात पवित्रा नागलगाव हिने प्रथम क्रमांक पटकावत विजेती ठरली. लहू चंदनशिवे याने ३३ मिनिटे ५६ सेकंदात १० किमी अंतर पार करत केवळ विजयच मिळवला नाही तर फिटनेससाठी आदर्श देखील ठेवला. शहरातील नागरिकांनी धावपटूंना प्रोत्साहन देण्यासाठी मोठी गर्दी केली होती, ज्यामुळे स्पर्धेला एका उत्सवाचे स्वरूप आले. येस न्यूज मराठी हे या मॅरेथॉन स्पर्धेचे सोशल मीडिया पार्टनर आहेत.
सकाळी स्पर्धेला सुरूवात होण्यापूर्वी स्पर्धकांना झुंबाचे धडे देत वार्मअप घेण्यात आला. दोन्ही गटाची धावण्याची सुरूवात एमआयटी विश्वप्रयाग युनिव्हर्सिटीचे कुलगुरू डॉ.गोपाळकृष्ण जोशी, एनटीपीसीचे एक्झीक्युटीव्ह डायरेक्टर बी.जे.सी. शास्त्री यांनी, बॅंक ऑफ महाराष्ट्रचे डेप्युटी झोनल मॅनेजर सुजीतकुमार झा, यश डेव्हलपर्सचे बापूसाहेब पाटील, प्राचार्य रेखा पाटील यांनी झेंडा मॅरेथॉन फ्लॅग फडकावून उद्घाटन केले.
विजेत्यांना पोलीस आयुक्त एम. राजकुमार, एमआयटी विश्वप्रयाग युनिव्हर्सिटीचे कुलगुरू डॉ.गोपाळकृष्ण जोशी, बी.जे.सी. शास्त्री, सुजीतकुमार झा, बापूसाहेब पाटील यांच्या हस्ते पारितोषिक देऊन गौरवण्यात आले. याप्रसंगी सकाळ सोलापूर युनिट हेड रुपेश मुतालिक, पुणे व सोलापूर सकाळचे संपादक संभाजी पाटील, सोलापूर सकाळचे सहयोगी संपादक सिद्धाराम पाटील, आणि मिलींद भुजबळ यांच्या हस्ते गौरवण्यात आले. श्वेता हुल्ले यांनी सूत्रसंचालन करून कार्यक्रमात रंगत आणली.
१० के गटातील विजेते व वेळ
पुरूष
लहू चंदनशिवे (११८०) – प्रथम- ३३.५६ मिनिटे
सुमित जावीर (१२०७) – द्वितीय -३४.५० मिनिटे
अनिल चव्हाण (११७३) – तृतीय – ३९.०९ मिनिटे
महिला
आरोही पाटील (१५२६) – प्रथम – ४४.४० मिनिटे
कोमल चव्हाण (१५१७) – द्वितीय – १ तास ३ मिनिटे २५ सेकंद
रेवती शिंदे (१५२७) – तृतीय – १ तास ३ मिनिटे ४५ सेकंद
५ किमी गटातील विजेते व वेळ
पुरूष
वैभव पाटील (५११५) – प्रथम – १८ मिनिटे
ओम हगलगुंडे (५२८७) – द्वितीय – १८.०२ मिनिटे
विराज जाधवर (५२८८) – तृतीय – १८.१३ मिनिटे
महिला
पवित्रा नागलगाव(६०७५) – प्रथम – २३.३१ मिनिटे
श्रद्धा गुंटुक (५११०) – द्वितीय – २३.५० मिनिटे
जेनिफर बुड्डीपुड्डी (६०७३) – तृतीय – २७.२४ मिनिटे
