एकीकडे भाजपकडून आगामी स्थानिक स्वराज्य संस्थांच्या निवडणुकीच्या पार्श्वभूमीवर स्वबळाचा नारा दिला जात असतानाच अनेक बड्या नेत्यांचे भाजपमध्ये इनकमिंग सुरू झाले आहे. त्यामुळे मुंबईतील भाजप कार्यालयात दररोज राज्यभरातील विविध नेत्यांचे पक्षप्रवेशाचे सोहळे रंगू लागले आहेत. सोलापूर जिल्ह्यातील तब्बल 28 जण आज कमळ हातात घेणार आहेत. यामध्ये अजित पवार गटाची माजी आमदार राजन पाटील, यशवंत माने, बबनराव शिंदे यांचे दोन्ही सुपुत्र यांच्या समवेत त्यांचे कार्यकर्ते प्रवेश करणार आहेत.
आज मुंबईमध्ये मेगा भरती असतानाच दिलीप माने यांचं काय असा प्रश्न सोलापूर जिल्ह्याला पडला आहे. दिलीप माने यांना पक्षांमध्ये घेऊ नये यासाठी कालच आमदार सुभाष देशमुख यांच्या कार्यकर्त्यांनी प्रदेशाअध्यक्ष रवींद्र चव्हाण यांची भेट घेतली भेट घेतली मात्र भाजपकडून कोणतेही ठोस आश्वासन दिले नाही. कोणावरही अन्याय होणार नाही असा शब्द देण्यात आला आहे. त्यामुळे पुढील आठवड्यात आमदार सुभाष देशमुख यांना विश्वासात घेऊन माजी आमदार दिलीप माने यांचा भाजप प्रवेश होणार हे नक्की समजले जात आहे. बाहेरच्या कुबड्या घेऊन भाजप लढण्यासाठी दंड थोपटत आहे त्यामुळे मूळ कार्यकर्ते मात्र भाजपच्या या संस्कृतीवर नाराज होऊ लागले आहेत.
