आगामी स्थानिक स्वराज्य संस्थांच्या निवडणुकीच्या पार्श्वभूमीवर सोलापूर जिल्ह्यातील राजकारणात उलथापालथ होऊ लागली आहे. भाजपमधील काही नेत्यांनी विरोध केला तरीही इतर पक्षातून बड्या नेत्यांना फोडाफोडी करून भाजपमध्ये घेण्याचे ऑपरेशन लोटस जोमाने सुरू आहे. मुख्यमंत्री देवेंद्र फडणवीस यांच्या फलटण दौऱ्यामध्ये माजी आमदार राजन पाटील माजी आमदार यशवंत माने तसेच माजी आमदार बबनराव शिंदे यांचे सुपुत्र आणि दूध संघाचे चेअरमन रणजीत शिंदे यांचा भाजप प्रवेश निश्चित झाला आहे. या तिघांचा बुधवारी मुंबईत पक्ष प्रवेश होईल तर माजी आमदार दिलीप माने यांचा देखील लवकरच पक्षात प्रवेश होईल अशी माहिती पालकमंत्री जयकुमार गोरे तसेच अक्कलकोटचे आमदार सचिन कल्याण शेट्टी यांनी दिली.
माजी आमदार दिलीप माने यांच्या पक्षप्रवेशाला आमदार सुभाष देशमुख यांनी विरोध केल्यामुळे त्यांच्या पक्षप्रवेशाला तूर्तास ब्रेक लागला आहे. मात्र त्यांना देखील भाजपमध्ये घेणारच असा चंग पालकमंत्र्यांनी बांधला आहे. त्यामुळे आता यामध्ये सुभाष देशमुख वरचढ ठरतात की पालकमंत्री हे लवकर स्पष्ट होणार आहे. बाहेरच्या नेत्यांना भाजपमध्ये घेऊन मोठी मोठी पदे आणि मानसन्मान दिला जात असल्यामुळे भाजपचे कार्यकर्ते दुखावले जात आहेत ही वस्तुस्थिती आहे.
