मुंबई : राज्यातील विधानसभा निवडणुकांसाठी उमेदवारी अर्ज भरण्याचा आज शेवटचा दिवस असून भाजपची 25 उमेदवारांची तिसरी यादी जाहीर करण्यात आली आहे. भाजपच्या तिसऱ्या यादीत आमदार राम सातपुते यांच्या नावाचा समावेश आहे. भाजपने माळशिरस विधानसभामधून पून्हा एकदा राम सातपुतेंनाच संधी दिली आहे. शरद पवार गटाच्या उत्तम जानकरांसोबत त्यांची लढत होणार आहे.
वर्सोवातून पुन्हा एकदा भारती लव्हेकर यांना निवडणुकीच्या मैदानात उतरवण्यात आलं आहे. लातूर शहरमधून अर्चना पाटील चाकूरकर तर चंद्रपूर किशोर जोरगेवार यांना भाजपने संधी दिली आहे. विशेष म्हणजे किशोर जोगरेवार यांनी एकच दिवसापूर्वी भाजपात प्रवेश केला होता. भाजपने 99 उमेदवारांची पहिली यादी जाहीर केली होती, त्यानंतर 22 उमेदवांची दुसरी यादी जाहीर केली. आता, भाजपने 25 उमेदवारांची तिसरी यादी जाहीर केली आहे. त्यामुळे, भाजपने 146 उमेदवारांना आत्तापर्यंत मैदानात उतरवल्याचं दिसून आलं. तिसऱ्या यादीत विदर्भातील 25 उमेदवारांच्या नावांची घोषणा करण्यात आलीय. डहाणू विधानसभेसाठी महायुतीकडून भाजपचे विनोद मेढा यांना उमेदवारी देण्यात आली आहे. विनोद मेढा भाजपचे तलासरी तालुका अध्यक्ष असून श्रीनिवास वनगा यांना महायुतीने उमेदवारी टाळली. बंडात एकनाथ शिंदे यांच्यासोबत गेलेल्या निष्ठावान श्रीनिवास वनगा यांना अखेर डावलण्यात आल्याचं स्पष्ट झालं आहे.
