येस न्युज नेटवर्क : मुंबईसह राज्यात आठवडाभर उष्णतेच्या झळा पाहायला मिळणार आहेत. त्यानंतर पुढील आठवड्यात अवकाळी पावसाची शक्यता वर्तवण्यात आली आहे. मे महिन्याच्या सुरुवातीच्या काही दिवसात तापमानात प्रचंड वाढ झाली आहे. आठवडाभर हे वातावरण कायम राहणार आहे. मुंबई, ठाणे, पालघर, रायगड भागात उष्णतेच्या लाटेचा इशारा देण्यात आला आहे. विदर्भ, मराठवाड्यातही तापमानात मोठी वाढ झाली आहे. हवामान विभागाकडून उष्णतेच्या लाटेचा इशारा देण्यात आला आहे.
मे महिन्यात तापमान वाढणार
आयएमडीने वर्तवलेल्या अंदाजानुसार, मे महिन्यात देशाच्या अनेक भागांमध्ये तीव्र उष्णता पाहायला मिळणार आहे. दीर्घकाळ उष्णतेची लाट येण्याचा इशारा दिला हवामान विभागाने दिला आहे. पूर्व भारतात 5 मेपर्यंत आणि दक्षिण द्वीपकल्पीय भारतात 6 मेपर्यंत उष्णतेची लाट कायम राहण्याची शक्यता आहे आणि त्यानंतर उन्हाची तीव्रता कमी होईल, असा अंदाज आहे. 5 आणि 6 मे रोजी ईशान्य भारतात गडगडाटी वादळ आणि सोसाट्याच्या वाऱ्यांसह मुसळधार ते अति मुसळधार पाऊस पडण्याची शक्यता आहे.
येत्या दोन दिवसांत तापमानात वाढ होणार
आर्द्रतेचे प्रमाण अजूनही कायम आहे. मुंबईत दिवसा आर्द्रता पातळी 56 टक्के आणि रात्री 67 टक्के नोंदवण्यात आली आहे. येत्या दोन दिवसांत तापमानात वाढ होणार आहे. हवामान तज्ज्ञांच्या अंदाजानुसार,, चक्रीवादळामुळे उत्तरेकडील हवेचे मुंबईच्या दिशेने होणाऱ्या स्थलांतराला वेग येईल, त्यामुळे तापमानात वाढ होईल. तापमान 36 अंश सेल्सिअसपर्यंत पोहोचू शकते.
