सोलापूर- पुण्यश्लोक अहिल्यादेवी होळकर सोलापूर विद्यापीठातर्फे तरुणाईला स्वयंरोजगार बनवण्यासाठी, कौशल्य विकासाला चालना देण्याकरिता तसेच उद्योजक पिढी निर्माण होण्यासाठी 29 फेब्रुवारी 2020 रोजी क्रिएट सेल्फ एम्प्लॉयमेंट उद्योजकता प्रोत्साहन शिबिर व प्रदर्शनाचे आयोजन करण्यात आले आहे. या कार्यक्रमाच्या माध्यमातून विद्यार्थ्यांना प्रोत्साहन देण्याबरोबरच नवउद्योजकांना आपल्या उद्योगाच्या प्रदर्शनाची संधी मिळणार असल्याची माहिती कुलगुरू डॉ. मृणालिनी फडणवीस यांनी दिली.
शहरातील संगमेश्वर कॉलेजच्या मैदानावर या उद्योजकता प्रदर्शनाचे आयोजन करण्यात आले आहे. राज्याचे उच्च व तंत्रशिक्षणमंत्री उदय सामंत हे उपस्थित राहून प्रदर्शनाचे उद्घाटन करण्याबरोबरच विद्यार्थ्यांना मार्गदर्शन करणार आहेत. पुण्यश्लोक अहिल्यादेवी होळकर सोलापूर विद्यापीठातर्फे प्रथमच अशा कार्यक्रमाचे आयोजन करण्यात आले आहे. या क्रिएट सेल्फ एम्प्लॉयमेंट उद्योजकता प्रोत्साहन शिबिर व प्रदर्शनामध्ये प्रामुख्याने नोकरीच्या मागे न लागता स्वतः स्वयंरोजगार बनवून उद्योजक कसे होता येईल, हा संदेश विद्यार्थ्यांना दिला जाणार आहे. त्यामध्ये तज्ञांचे मार्गदर्शन मिळण्याबरोबरच यशस्वी उद्योजक, उद्योजक होण्यासाठी आवश्यक स्किल्स आणि विविध प्रकारचे सूक्ष्म, लघु, मध्यम उद्योग उभा करून स्वयंरोजगार प्राप्त केलेल्या मान्यवरांचे दालन व माहिती मिळणार आहे.
कृषी, अन्नदान, औद्योगिक, वैद्यकीय, सेवाक्षेत्र आदी विविध क्षेत्रांमध्ये स्वयंरोजगाराच्या मोठ्या संधी आहेत. या संधीची माहिती विद्यार्थ्यांना व्हावी व त्यातून प्रेरणा घेऊन स्वतः स्वयंरोजगार करिता सक्षम होण्यासाठी पुण्यश्लोक अहिल्यादेवी होळकर सोलापूर विद्यापीठातर्फे क्रिएट सेल्फ एम्प्लॉयमेंट उद्योजकता शिबिर व प्रदर्शनाचे आयोजन करण्यात आल्याची माहिती कुलगुरू डॉ. मृणालिनी फडणवीस यांनी दिली. या प्रदर्शनात शासकीय-निमशासकीय संस्था तसेच विविध बँका आणि उद्योजकांच्या स्टॉलचा समावेश राहणार आहे.
स्टॉलसाठी नोंदणी सुरु
पुण्यश्लोक अहिल्यादेवी होळकर सोलापूर विद्यापीठामार्फत आयोजित क्रिएट सेल्फ एम्प्लॉयमेंट उद्योजकता प्रशिक्षण शिबीर व प्रदर्शनात स्वतः उद्योग उभा केलेल्या उद्योजकांना स्टॉल घालण्याची सुवर्णसंधी मिळणार आहे. यामध्ये विविध प्रकारच्या सूक्ष्म, लघू, मध्यम उद्योगांचा समावेश राहील. बचत गटांच्या महिलांनाही यामध्ये स्टॉल घेऊन आपल्या उद्योगाचे प्रमोशन करण्याची संधी आहे. याकरिता सध्या स्टॉलची नोंदणी सुरू झाली आहे. विद्यापीठाच्या संकेतस्थळावर नोंदणीची लिंक देण्यात आली आहे. अधिक माहितीसाठी डॉ. रमेश गाढवे 9421912216 आणि प्रा. अमोल वीर 9730357839 यांच्याशी सपर्क साधावा, असे आवाहन विद्यापीठाकडून करण्यात आले आहे.
