सोलापूर : जिल्ह्यात विविध डाळींची साठेबाजी रोखण्यासाठी डाळ मिलमालक, परवानाधारक गोदाममालक, डाळ मिल असोसिएशनच्या पदाधिकाऱ्यांनी प्रशासनास संपूर्ण सहकार्य करावे, असे प्रतिपादन जिल्हाधिकारी मिलिंद शंभरकर यांनी आज येथे केले.
डाळींची साठेबाजी रोखण्यासाठी आवश्यक उपाययोजनांसदर्भात आयोजित बैठकीच्या अध्यक्ष स्थानावरून ते बोलत होते. जिल्हा नियोजन भवनच्या सभागृहात झालेल्या या बैठकीस पोलीस उपायुक्त अजित बोऱ्हाडे, जिल्हा पुरवठा अधिकारी वर्षा लांडगे, अन्नधान्य वितरण अधिकारी सुमित शिंदे, सहाय्यक जिल्हा पुरवठा अधिकारी विवेक साळुंके यांच्यासह शहरातील डाळ मिलमालक, जिल्ह्यातील सर्व डाळ मिल असोसिएशनचे पदाधिकारी उपस्थित होते..
डाळींची साठेबाजी रोखण्यासाठी मिल्स व गोदामांची तपासणी करण्यासाठी पथकांची नियुक्ती करण्यात आलेली आहे. या पथकांनी जिल्ह्यातील सर्व डाळ मिल्स व गोदामे यांची काटेकोर तपासणी करावी, अशा सूचना पुरवठा विभागाच्या अधिकाऱ्यांना देऊन जिल्हाधिकारी मिलिंद शंभरकर म्हणाले. पाहणीस आलेल्या या पथकांना आवक जावक रजिस्टर व इतर सर्व कागदपत्रे उपलब्ध करून द्यावीत. डाळींची आवक व जावक याचा हिशोब द्यावा, संकेतस्थळावर सत्य माहिती भरावी, अशा सूचना जिल्हाधिकारी श्री. शंभरकर यांनी यावेळी केल्या.. यावेळी डाळ मिलमालकांनी असोसिएशनच्या पदाधिकाऱ्यांनी प्रशासनास सहकार्य करण्याची हमी दिली.
