सोलापूर : जिल्ह्यातील अनेक गावांमध्ये परिस्थितीमुळे केवळ सायकल नसल्यामुळे शाळा सोडावी लागते. ही बाब समोर आल्यानंतर जिल्हा परिषदेचे मुख्य कार्यकारी अधिकारी दिलीप स्वामी यांनी सायकल बॅंकेची संकल्पना मांडली. त्यांनी जिल्ह्यातील दानशूर नागरिक व संस्थांना सायकल बॅंकेसाठी लोकसहभागासाठी आवाहन केले. माळशिरस तालुक्यातील निमगाव मध्ये सुरू झालेल्या या उपक्रमास जिल्हाभरातून चांगला प्रतिसाद मिळत असून आज महाराष्ट्र बॅंकेने सायकल बॅंकेसाठी 25 सायकली भेट दिल्या. महाराष्ट्र बॅंकेचे झोनल मॅनेजर दत्तात्रय कावेरी यांनी जिल्हा परिषदेच्या आवारात 25 सायकली मुख्य कार्यकारी अधिकारी दिलीप स्वामी यांच्याकडे सुपूर्द केल्या.
यावेळी बोलताना दत्तात्रय कावेरी म्हणाले की मुलींच्या शिक्षणासाठी सामाजिक दायित्व पार पाडण्याची एक चांगली संधी सीईओ स्वामी यांनी आम्हाला उपलब्ध करून दिली त्याबद्दल मी महाराष्ट्र बॅंकेच्या वतीने सीईओ स्वामी यांचे आभार मानतो. आज महाराष्ट्र बॅंकेच्या वर्धापन दिनाचे औचित्य साधून 25 सायकली सी एस आर फंडातून जिल्हा परिषदेच्या सायकल बॅंकेसाठी देताना आनंद होतो आहे.
सीईओ स्वामी म्हणाले की मागील सहा महिन्यांपासून सुरू झालेल्या या उपक्रमास जिल्हाभरातून भरभरून प्रतिसाद मिळत आहे. हा उपक्रम न राहता एक चळवळ झाली आहे. यामाध्यमातून मुलींच्या शिक्षणाला मोठा हातभार लागत आहे याचा मनस्वी आनंद होत आहे. या निमित्ताने बेटी बचाव बेटी पढाओ चा उद्देश पूर्ण पुर्ण होतोय.
यावेळी नवनीत किंग, डेप्युटी झोनल मॅनेजर, बॅक ऑफ महाराष्ट्र, सोलापूर झोन,अतिरिक्त मुख्य कार्यकारी अधिकारी संतोष धोत्रे, मुख्य लेखा व वित्त अधिकारी अजयसिंह पवार, उपमुख्य कार्यकारी अधिकारी इशाधीन शेळकंदे, उपमुख्य लेखा व वित्त अधिकारी उत्तम सुर्वे, कृषि विकास अधिकारी विवेक कुंभार, लेखाधिकारी कैलास कुंभार, चंद्रकांत पाटील, संजय अंबोले यांच्यासह अर्थ विभागातील कर्मचारी बहुसंख्येने उपस्थित होते.
