नवी दिल्ली : देशाच्या राष्ट्रपतींची निवड होऊन एक आठवडाही झालेला नाहीय, तोच राष्ट्रपतींवर एक टिपण्णी करुन काँगेसच्या अधीर रंजन चौधरी यांनी एक वाद ओढवून घेतलाय. या सगळ्यावरुन संसदेच्या बाहेर, संसदेतही बरंच नाट्य घडलं. काँग्रेसचे लोकसभेतले गटनेते अधीर रंजन चौधरी यांनी राष्ट्रपतींचा उल्लेख राष्ट्रपत्नी असा केला..आणि त्यावरुन सत्ताधारी भाजपनं आज संपूर्ण सभागृह दणाणून सोडलं. वातावरण इतकं पेटलं की थेट सोनिया गांधींच्याच माफीची मागणी भाजपनं केली. स्मृती इराणी म्हणजे भाजपच्या गांधी कुटुंबाविरोधातल्या शस्त्रच. आज त्यांनीच थेट गांधींवर हल्लाबोल केला. संसदेत त्यानंतरही बरंच नाट्य घडलं. पण त्याआधी समजून घेऊ हा सगळा वाद सुरु कुठून झाला. तर काँग्रेस नेते अधीर रंजन चौधरी यांच्या एका मुलाखतीवरुन वादाला सुरुवात झाली.
संसदेच्या बाहेर एबीपी न्यूजशी बोलत असताना त्यांनी राष्ट्रपतींसाठी हा शब्दप्रयोग वापरला. त्यानंतरच वादाला सुरुवात झाली. या मुद्द्यावरुन संसदेत गदारोळ झाल्यानंतर सभागृह तहकूब करण्यात आलं. त्यानंतरही एक नाट्य घडलं. सोनिया गांधी यांनी एक अनोखं पाऊल उचललं आणि जे भाजप खासदार निदर्शनं करत होतं, त्यांच्या बाजूला त्या गेल्या. आणि तिथे रमा देवी यांना त्यांनी विचारलं की, माझं नाव यात का ओढलं जातंय? शेजारीच स्मृती इराणीही होत्या. त्यांनी त्यात बोलायचा प्रयत्न केला. त्यावर सोनिया गांधींनी डोन्ट टॉक टू मी असं म्हटल्याचा भाजपचा दावा आहे.
