सोलापूर – राज्य सरकारच्या माझी वसुंधरा अभियानांतर्गत सोलापूर महापालिकेचे ब्रँड अँबेसिडर व प्रसिद्ध चित्रकार सचिन खरात यांच्या वाढदिवसानिमित्त आयोजित केलेल्या चित्रकला स्पर्धेत 2500 हून अधिक चित्रकारांनी सहभाग नोंदविला. अनेक वर्षानंतर नाना-नानी पार्क बाल कलाकारांच्या गर्दीने बहरले होते.
महापालिकेच्या सात रस्ता येथील नाना नानी पार्कमध्ये ही स्पर्धा आयोजित करण्यात आली होती. स्पर्धेचे उद्घाटन पोलीस अधीक्षक तेजस्विनी सातपुते, आसाम राज्यातील जिल्हाधिकारी नरसिंग पवार, पालघर जिल्हा परिषदेचे मुख्य वित्त व लेखाधिकारी धनराज पांडे, ज्येष्ठ पत्रकार राजा माने, युवा उद्योजक सिद्धाराम डोमनाळे, संजीवनी आर्ट गॅलरीचे चेतन बुरानपुरे, स्टाईल मंत्राच्या सोनल चौधरी, महापालिकेचे पर्यावरण अधिकारी स्वप्निल सोलनकर, जय विजय पेस्ट कंट्रोलचे बाहेती, महिंद्रा इन्शुरन्स लिमिटेडचे क्लस्टर मॅनेजर उमेश अनभवने यांच्या उपस्थितीत झाले. पहिली ते चौथी, पाचवी ते सातवी, आठवी ते दहावी अशा तीन गटांमध्ये ही स्पर्धा आयोजित करण्यात आली होती. पोलीस अधीक्षक तेजस्विनी सातपुते म्हणाल्या, विद्यार्थ्यांमधील कलागुणांना वाव देण्यासाठी चित्रकला स्पर्धा आवश्यक आहे. चित्रकाराच्या वाढदिवसानिमित्त चित्रकला स्पर्धा होणे हे कौतुकास्पद आहे. दरम्यान, प्रमुख पाहुण्यांना आणि चित्रकला स्पर्धेत सहकार्य करणाऱ्या मंडळींना रोपे भेट देण्यात आली. या चित्रकला स्पर्धेचे बक्षीस वितरण लवकरच होणार आहे.
