सोलापूर : गुन्ह्यात आरोपी न करण्यासाठी एक लाखाची लाच मागून 50 हजार रुपये स्वीकारताना जोडभावी पेठ पोलीस ठाण्याचे सहाय्यक पोलीस निरीक्षक दिनेश श्रीकांत कुलकर्णी यांना लाचलुचपत प्रतिबंधक विभागाने रंगेहात पकडले असून त्यांच्यावर गुन्हा दाखल करण्याचे काम सुरू आहे. या सहाय्यक पोलीस निरीक्षकाला पुणे या ठिकाणी सोलापूर विभागातील लाचलुचपत प्रतिबंधक विभागाने रात्री पावणे दोनच्या सुमारास ताब्यात घेतल्याची माहिती मिळत आहे.
प्राप्त तक्रारीनुसार तक्रारदार यांचा मेहुणा याचे विरुध्द जोडभावीपेठ पोलीस स्टेशन, सोलापूर शहर येथे गुन्हा दाखल असुन सदर दाखल गुन्हयाचा तपास यातील आरोपी लोकसेवक दिनेश श्रीकांत कुलकर्णी हे करीत आहेत. सदर गुन्हयात तक्रारदार, त्यांची पत्नी, सासु, मोठा मेहुणा, मेहुणी व तीचा नवरा (तक्रारदार यांचा साडु) असे देखील आरोपी होत असल्याबाबत सांगुन जर त्यांना आरोपी करायचे नसेल तर तक्रारदार यांच्याकडे ०१ लाख रुपये लाचेची मागणी करून तडजोडी अंती ५०,०००/- रुपये स्विकारण्याचे मान्य करुन वैयक्तीक सांपत्तीक फायदा मिळवण्यासाठी गुन्हेगारी स्वरूपाचे वर्तन केले आहे.
यातील आलोसे यांना लाच मागणी केले वरुन दि. ०८/०३/२०२२ रोजी पकडण्यात आलेले आहे. यातील आरोपी लोकसेवक यांना चौकशीकामी ताब्यात घेण्यात आले असुन गुन्हा दाखल मार्गदर्शन अधिकारी करण्याची कार्यवाही सुरु आहे.
