सोलापूर : विधवा महिलेच्या सासऱ्यांच्या नावे बनावट मृत्युपत्र तयार करून जमीन हडपण्याचा प्रयत्न केल्याप्रकरणी अकरा जणांविरुद्ध गुन्हा दाखल झाला आहे. यापैकी दोघांना रविवारी अटक झाली आहे. वसंत दिवटे, प्रभा दिवटे, जुबेर उर्फ जिब्राईल आदम शेख, महिबूब दाऊदसाब शेख, इरफान महिबूब शेख (रेल्वे लाइन, फॉरेस्ट), राज जी. सुरेख इंगळे (ढोरगल्ली), सादिक अकबर शेख, अर्जुन शिवराम रामगीर, म.अली म.हफीज मसूद, अॅड. पारसनाथ नारायणकर, अॅड. प्रकाश पिसे या अकरा जणांवर गुन्हा दाखल झाला आहे. वसंत दिवटे आणि प्रभा दिवटे या दोघांना अटक करण्यात आली.
स्वाती रघुनंदन दहिहंडे (रा. आयडीआयसी ऑफिस समोर, होटगी रोड, सध्या रा. पटेल चौक रायचूर, कर्नाटक) यांनी २५ डिसेंबर रोजी विजापूर नाका पोलिसात तक्रार दिली आहे. २९ आॅक्टोबर २०१९ ते ४ नोव्हेंबर २०२१ या दरम्यान आयडीआयसी ऑफिस, होटगी रोड येथे हा प्रकार घडला आहे. स्वाती दहीहंडे यांचे पती रघुनंदन व सासरे नरेंद्र दहिहंडे यांचे निधन झाले आहे. वारसाहक्काने व कायदेशीर मार्गाने जागेचा कब्जा त्यांच्याकडे आहे. वसंत, प्रभा, जुबेर, महिबुब, इरफान व इंगळे यांनी संगनमत करून त्यांच्या सासऱ्यांचे बनावट मृत्यूपत्र तयार केले. यात सादिक शेख, अर्जुन रामगीर, म. अली मसूद यांनी मदत केली.अॅड. नारायणकर व अॅड. पिसे दोघांनी बनावट नोटरी करण्यासाठी ओळख दिली, असे फिर्यादित नमूद आहे. दहिहंडे यांच्या घरातील मंदिरातून चांदीचे मुकुट व गदा आदी ७० हजार किमतीच्या वस्तू गायब झाल्याचे तक्रारीत म्हटले आहे. फौजदार सुराज मुलाणी तपास करत आहेत.
