सांगोला : ज्येष्ठ नेते भाई गणपतराव देशमुख यांच्या निधनाचे वृत्त समजतात संपूर्ण सांगोला तालुक्यात हळहळ व्यक्त करण्यात आली. आज शनिवारी सकाळी सोलापूरहून त्यांचे पार्थिव सांगोला तालुक्यात येणार असल्याने पंढरपूर – सांगोला रस्त्यावर त्यांच्या दर्शनासाठी नागरिकांनी मोठी गर्दी केली होती. सोशल मीडियावर तर फक्त आबासाहेबांचे फोटो झळकत आहेत. शुक्रवारी रात्री माजी आमदार गणपतराव देशमुख यांचे निधन झाल्याची बातमी सोशल मीडियावरून समजल्यावर सोशल मीडियावर फक्त आबासाहेबांचे फोटो व त्यांचे कर्तृत्व झळकत होते. याबाबत त्यांच्या आठवणींना उजाळा देताना विविध कमेंट्सही दिल्या जात होत्या. आज शनिवारी सकाळी सोलापूरहून त्यांचे पार्थिव सांगोला तालुक्यात दर्शनासाठी येणार असल्याने सांगोला – पंढरपूर रस्त्यावरील गावा-गावात नागरिक त्यांच्या अंत्यदर्शनासाठी उभे होते. पंढरपूरवरून येताना रस्त्यावरून खर्डी, संगेवाडी, मांजरी, मेथवडे फाटा, बामणी, बिलेवाडी फाटा या ठिकाणी नागरिक मोठ्या संख्येने उपस्थित होते. सकाळी नऊ वाजण्याच्या सुमारास सांगोला तालुक्यातील संगेवाडी येथे आबासाहेबांचे पार्थिव आले असता नागरिकांनी “आबासाहेब तुम अमर रहे’ अशा घोषणा दिल्या. त्यांच्या पार्थिवाजवळ त्यांचे नातू डॉ. बाबासाहेब देशमुख व डॉ. अनिकेत देशमुख होते. या वेळी तालुक्यातील शेकापतील विविध पदाधिकाऱ्यांच्या गाड्यांचा ताफाही बरोबर होता.
