ऑक्सीजन बेड्स व्हेंटिलेटर उपलब्ध नाहीत
रेमडेसिविर इंजेक्शन्स ची कमतरता रुग्णांच्या नातेवाईकांची वणवण
येस न्युज मराठी नेटवर्क (गिरीष गोरे) : सोलापूर महापालिकेच्या covid-19 कंट्रोल रूम मधील आकडेवारीनुसार मार्च महिन्यात ६९व्यक्तींचा कोरोनामुळे मृत्यू झाल्याचे स्पष्ट होत आहे . एक एप्रिल पासून 15 एप्रिल पर्यंत सोलापूर शहरात 136 व्यक्तींचा विविध रुग्णालयात कोरोना मुळे मृत्यू झालेला आहे. सध्या सोलापूर महापालिकेच्या विविध कोरोना रुग्णालयात तसेच खाजगी 28 रुग्णालयातील सर्व बेड्स कोरोनाबाधित रुग्णांनी व्यापले गेले आहेत. सध्या एकही बेड शिल्लक नसल्याचे स्पष्ट होत आहे. कोरोनाबाधितांच्या संख्येत सातत्याने वाढ होत असताना व्हेंटिलेटर आणि ऑक्सिजन बेड्स पुरेसे नसल्याचेही दिसून येत आहे .ऑक्सिजन आणि व्हेंटिलेटर वेळेवर मिळत नसल्यामुळे गेल्या पंधरा दिवसात कोरोना बाधितांच्या मृत्यूचे प्रमाण वाढत असल्याचे आता स्पष्ट झाले आहे. जिल्हाधिकाऱ्यांनी 10 एप्रिल रोजी सहाय्यक आयुक्त अन्न व औषध प्रशासन यांच्याकडे कोरोना सेंटर जिल्ह्यासाठी उभारण्यात आल्याचे परिपत्रक काढले होते. प्रत्यक्षात 940 578 36 36 हा मोबाईल क्रमांक कधीही उचलला जात नाही, अशी कोरोना बाधित रुग्णांच्या नातेवाईकांची तक्रार आहे. रेमडेसिविर इंजेक्शन कोरोना बाधितांना वाचण्यासाठी अतिशय उपयुक्त असले तरी ते सध्या उपलब्ध होत नसल्यामुळे कोरोना बाधित रुग्णांचे नातेवाईक हवालदिल झाल्याचे दिसत आहे. महापालिकेच्या covid-19 सेंटरमध्ये वारंवार संपर्क साधून देखील त्याचप्रमाणे जिल्हाधिकाऱ्यांनी काढलेल्या परिपत्रकानुसार अन्न व औषध प्रशासन, सहाय्यक आयुक्त यांच्या मोबाईल क्रमांकावर संपर्क साधून देखील रेमडेसिविर उपलब्ध होत नसल्याचे कोरोनाबाधित रुग्णांच्या नातेवाईकांनी अत्यंत उद्विग्नपणे स्पष्ट केले. महापालिकेच्या covid-19 कंट्रोल रूम मधील एका कर्मचाऱ्याने नाव न सांगण्याच्या अटीवर सांगितले की या सेंटरला बार्शी, पुणे ,उमरगा ,मंगळवेढा, लातूर इत्यादी गावांमधून ऑक्सिजन बेड आणि वेंटिलेटर उपलब्ध आहेत का ?अशी विचारणा गेल्या आठवडाभरात होत आहे. संपूर्ण राज्यातच कोरोना बाधितांची संख्या झपाट्याने वाढत असून मृत्यूचा दर देखील वाढला असल्याचे या कर्मचाऱ्यांनी सांगितले. रेमडेसिविरसाठी वणवण फिरणाऱ्या कोरोना बाधित रुग्णांच्या नातेवाईकांचा आक्रोश पाहून अनेक वेळा रात्री झोप लागत नसल्याचेही या कर्मचाऱ्याने सांगितले.
