अज्ञात व्यक्तीची अयोध्येतील राम जन्मभूमी बॉम्बने उडवून देण्याची धमकी

अयोध्या (उत्तरप्रदेश): रामजन्मभूमी येथील यलो झोन परिसरात असलेल्या रामलला सदनमध्ये राहणाऱ्या मनोज कुमार यांच्या मोबाईलवर एका अज्ञात व्यक्तीने फोन करून रामजन्मभूमी बॉम्बने उडवून देण्याची धमकी दिली आहे. मनोज कुमार यांच्या मोबाईल क्रमांकावर पहाटे साडेपाच वाजता अज्ञाताने कॉल करून धमकी दिली की, मी दिल्लीहून बोलत असून आज दहा वाजता रामजन्मभूमी बॉम्बने उडवून दिली जाईल. तक्रारदार मनोज यांनी माहिती दिल्यानंतर रामजन्मभूमी पोलीस स्टेशन प्रभारी यांनी एफआयआर नोंदवला आहे. पोलीस या प्रकरणात तपास करत आहेत. पोलिसांनी त्याने दिलेल्या मोबाईल क्रमांकाचा तपास सुरू केला आहे. पोलीस स्टेशन अध्यक्ष संजीव कुमार सिंह यांच्या वतीने रामजन्मभूमी येथे गुन्हा दाखल करण्यात आला आहे. पोलिसांनी या संपूर्ण प्रकरणाचा तपास सुरू केला आहे.